रुकुम पश्चिमको आठबीसकोट नगरपालिकाले आगामी आर्थिक वर्ष २०७९/०८० का लागि साढे ६७ करोड बजेट विनियोजन गरेको छ । आजको नगर सभामा उपप्रमुख धनकुमारी शाहीले ६७ करोड ६३ लाख २५  हजार ४ सय ५० रुपैंया बराबरको बजेट पेश गर्नुभयो । कुल विनियोजित रकम मध्ये चालु तर्फ ४४ करोड ३३ लाख २५ हजार ४ सय ५० रुपैंया अर्थात ६५.५४ प्रतिशत रकम र पुँजीगत तर्फ २३ करोड २९ लाख ९९ हजार ९ सय ९८ रुपैंया अर्थात ३४.४६ प्रतिशत रकम रहेको छ ।

प्रस्तावित कुल बजेट मध्य संघीय समानीकरण अनुदान तर्फ १२ करोड १३ लाख, राजश्व वाँडफाँडवाट प्राप्त हुन आएको रकम १३ करोड ६५ लाख २१ हजार रहेको छ । त्यस्तै प्रदेश सरकारवाट  बितिय समानिकरण अनुदान वाफतको १ करोड २१ लाख ७७ हजार, राजश्व वाँडफाँडवाट प्राप्त हुन आएको रकम २० लाख ७७ हजार ४ सय ४८ रुपैंया छ । त्यस्तै संघीय सरकारवाट ससर्त अनुदान २२ करोड ८१ लाख, विशेष अनुदान २ करोड १० लाख र समपुरक अनुदान रकम १ करोड ६० लाख आउने अनुमान गरिएको छ ।

प्रदेश सरकारबाट सर्सत अनुदान ७६ लाख ५० हजार र स्थानीय राजश्व वाँडफाँड तथा स्रोत परिचालन गरि आन्तरिक आयतर्फ ३ करोड ८५ अनुमान गरिएको छ । नगरपालिकाले कृषि तथा पशुपालमा तर्फ २ करोड १६ लाख, उद्योग तथा वाणिज्य तर्फ ३० लाख, शिक्षा तर्फ २२ करोड ८० लाख, युवा तथा खेलकुद १६ लाख, स्वास्थ्य तर्फ ५ करोड ८९ लाख ८९ हजार, सडक तथा पुल पुलेसा तर्फ ४ करोड ८५ लाख र सिँचाइ खानेपानी तथा सरसफाइ तर्फ २ करोड ३ लाख विनियोजन गरेको छ । 

विद्युत तथा बैकल्पिक उर्जा तर्फ १२ लाख, सुचना तथा सञ्चार तर्फ ३० लाख, भवन तथा सहरी आवास तर्फ ८ करोड ५७ लाख, धार्मिक संस्कृति तथा पर्यटन २ करोड २९ लाख, सहकारी गरिबी निवारण तथा रोजगार व्यवस्थापन तर्फ २ करोड २९ लाख, वन तथा वातावरण भू–संरक्षण, विपत् तथा फोहोरमैला व्यवस्थापन तर्फ ४५ लाख छुट्याईएको छ । त्यस्तै संस्थागत विकास, सुशासन तथा सेवा प्रवाह तर्फ ११ करोड ५० लाख, वडा गत विनियोजन तर्फ ३ करोड विनियोजन गरिनुका साथै नगरपालिकामा कार्यरत करार कर्मचारीहरुको तलब २ हजार बढाईएको छ ।  

नीति तथा कार्यक्रम पनि नगर सभामा पेश भएको छ । नगर प्रमुख रवि केसीले आर्थिक बर्ष २०७९/०८० नीति तथा कार्यक्रम पेश गर्नुभएको हो । प्रस्तुत नीति तथा कार्यक्रममा कृषि तथा पशुपालनलाई पहिलो प्राथमिकता दिइएको छ । त्यस्तै शिक्षा, स्वास्थ्य, रोजगार, सडक, खानेपानी तथा सरसफाइ, सिँचाइ, युवा तथा खेलकुद, वन तथा वाताबरण, बिद्युत लगायतका कार्यक्रमहरु समावेश गरिएको छ । 

त्यसैगरी सुचना र सञ्चार, कला, संस्कृति, सहकारी, पर्यटन र औद्योगिक विकास निर्माण लगायतका कार्यक्रमहरु पनि समाबेश गरिएको छ । नगरसभामा पेश गरेको नीति तथा कार्यक्रम र बजेटमा छलफल गर्नका लागि भने पुनः नगरसभाको अर्को बैठक बस्ने भएको छ । बिषयगत समिति र कार्यपालिका हुदै सबैतिर छलफल गरि फेरि बस्ने नगर सभाले नीति तथा कार्यक्रम र बजेट पास गर्ने बताइएको छ ।