रुकुम पूर्वको सिस्ने गाउँपालिका वडा नम्बर ३ को कार्यालयमा क्षति पुगेको छ । माथिबाट खसेको ढुंगाले लाग्दा पोखरा गाउँमा रहेको वडा कार्यालयको बैठक हलमा क्षेति पुगेको छ । वडा कार्यालय भवन भन्दा माथिबाट खसेको ढुंगा फिल्ड हुँदै गेट भत्काएर वडा कार्यालय भित्र छिरेको थियो । आज बिहान पौने ५ बजेतिर उक्त घटना भएको बताईएको छ ।

एक छेउको भित्ता फोडेर भित्र पसेको ढुंगा अर्को छेउको भित्ता फोडेर बाहिर निस्किएको जनता मावि पोखराका प्रध्यानाध्यापक कलु खड्काले जानकारी दिनुभयो । ढुंगाले गेट, दुई तिरको भित्ता, वैठक कक्षमा भएका कुर्सी, तारबार लगायतमा क्षति गरेको उहाँको भनाई छ । क्षतिको एकिन विवरण भने संकलनको काम भइरहेको उहाँले बताउनुभयो । यसका लागि वडा कार्यालयमा प्रहरीको टोली पुगेको छ । १ तले ४ कोठे पक्की भवन २ वर्ष अगाडी निर्माण गरिएको थियो ।