रुकुम पश्चिमको मुसीकोट नगरपालिका वडा नम्बर १३ ले असल आमा सुत्केरी प्रोत्साहन कार्यक्रम ल्याएको छ । सुत्केरी आमा र शिशुलाई लक्षित गरेर वडाले चालु आर्थिक वर्षका लागि यो कार्यक्रम ल्याएको हो । श्रावण १ गतेबाट सुरु भएको कार्यक्रमका लागि वडाले १ लाख बजेट विनियोजन गरेको छ ।यस कार्यक्रमबाट सुत्केरीलाई १ हजार रुपैंया वितरण गरिने वडाध्यक्ष खलबहादुर खड्काले जानकारी दिनुभयो । नगद सहित आमालाई न्यानो बर्की र शिशुलाई न्यानो कपडा समेत वितरण गरिने उहाँको भनाई छ । यसबाट आमा र शिशुको पोषण स्थितिमा सुधार आउने अपेक्षा गरिएको उहाँले बताउनुभयो । 

त्यस्तै वडाले महिला महिला स्वास्थ्य स्वयंसेविकाहरुलाई भत्ता दिने भएको छ । यसै कार्यक्रमबाट वडामा रहेका ४ जना महिला स्वास्थ्य स्वयंसेविकाहरुलाई मासिक ५ सयका दरले भत्ता बाँडिने वडाध्यक्ष खड्काले बताउनुभयो । विना तलव काम गरिरहेका स्वयंसेविकाहरुलाई यसबाट प्रोत्साहन हुने अपेक्षा वडाले लिएको छ । असल आमा सुत्केरी प्रोत्साहन कार्यक्रम अन्तरगत आज एक सुत्केरीलाई घरमै पुगेर एक हजार नगद र न्यानो कपडा वितरण गरिएको छ । वडाध्यक्ष खड्का, सदस्य मिलन खड्का, गोपालसिंह केसी, वडा सचिव युवराज खड्का, महिला स्वास्थ्य स्वयंसेविका कमला केसीको उपस्थितिमा विवशा खड्कालाई स्याहार खर्च उपलब्ध गराईएको हो । 

यसैविच यो कार्यक्रमका विषयमा वडाले आज वडामा रहेका सरोकारवालाहरुसंग अन्तरक्रिया गरेको छ । सरोकारवालासंग यो कार्यक्रमको उद्ेश्यका विषयमा छलफल गरिएको वडाध्यक्ष खड्काले बताउनुभयो । कार्यक्रममा मुसीकोट नगरपालिकाका स्वास्थ्य शाखा संयोजक मानबहादुर खत्री, स्वास्थ्य चौकी इन्चार्ज चन्द्रबिर रोका लगायतको उपस्थिति रहेको थियो ।