रुकुम पश्चिममा एक बृद्धाले खोलामा हाम फालेर आत्महत्या गरेकी छन् । जिल्लाको मुसीकोट नगरपालिका वडा नम्बर १२ बैरागीठाँटीकी ६८ वर्षिया मुनी नेपालीले साँख खोलामा हाम फालेर आत्महत्या गरेको प्रहरीले जनाएको छ । घर नजिकैबाट खोलामा हाम फालेकी नेपालीको शव बुधबार दिउँशो मुसीकोट नगरपालिका वडा नम्बर ३ मुग्लुखोलामा फेला परेको जिल्ला प्रहरी कार्यालयका प्रहरी निरीक्षक राजिव श्रेष्ठले जानकारी दिनुभयो । खोलामा हाम फालेको स्थानीयले देखेपछि बिहान साढे १० बजेतिर प्रहरीलाई खवर आएको उहाँले बताउनुभयो ।

त्यसपछि खटिएको प्रहरी टोलीले दिउँशो साढे १ बजेतिर नेपालीको शव फेला पारेको प्रहरी निरीक्षक श्रेष्ठको भनाई छ । नेपाली लामो समय देखि दमको समस्याबाट ग्रसित रहेको बताईएको छ । उनले केही दिन देखि बेला बेला मर्छु भन्ने गरेको स्थानीयको भनाई छ । परिवारले उपचार गरिरहेको र पछिल्लो पटक अस्पताल जाउँ भन्दा पनि जान्न भनिरहेकी थिइन् । नेपालीको मानसिक स्थिति पछिल्लो समय त्यति राम्रो नरहेको बताईएको छ । शव पोष्र्टमार्टमका लागि जिल्ला अस्पताल सल्लेमा राखिएको प्रहरीले जनाएको छ ।