रुकुम पश्चिममा जेष्ठ नागरिकहरुका लागि निःशुल्क दिवा खाजा कार्यक्रम सन्चालन गरिएको छ । जेष्ठ नागरिक जिल्ला संघ रुकुम पश्चिमले जिल्ला भित्र रहेका जेष्ठ नागरिकलाई लक्षित गरी निःशुल्क दिवा खाजा कार्यक्रम सन्चालन गरेको हो ।
जेष्ठ नागरिकलाई सहजताका लागि जिल्लामै निःशुल्क रुपमा दिवा खाजा कार्यक्रम सन्चालन गरिएको जेष्ठ नागरिक जिल्ला संघका सचिव गोकर्ण पुनले जानकारी दिनुभयो । उहाँका अनुसार २०७८ साल चैत देखि जिल्लाको सदरमुकाम मुसिकोट १ खलंगामा कार्यालय स्थापन गरी जेष्ठ नागरिकलाई दिवा खाजा अन्तर्गत फलफूल, चिया, बिस्कुट लगायत जेष्ठ नागरिकले रुचाउने खाजा दिइन्छ ।
जेष्ठ नागरिकहरुको रमाइलो लागि कार्यालयमै टिभी, मादल, खैचडीको पनि व्यवस्था गरिएको छ । यसबाट जेष्ठ नागरिकले मनोरञ्जन पनि गर्न सक्छन् । यस बारेमा सबैलाई जानकारी नहुँदा अहिले दिवा खाजाको लागि जेष्ठ नागरिकहरु थोरै मात्रामा आउने गरेका छन । जेष्ठ नागरिक जिल्ला संघले रुकुम पश्चिमका ६ वटै स्थानीय तहका जेष्ठ नागरिकलाई लक्षित गरेर कार्यालय तथा यो सेवा सञ्चालनमा ल्याएको हो हो ।
जेष्ठ नागरिक दिवा खाजाको लागि सामाजिक विकास कार्यालय रुकुम पश्चिमले १ लाख रकम र मुसिकोट नगरपालिकाले ३ लाख बजेट विनियोजन गरेका छन् । गत आर्थिक वर्ष २०७८/०७९ मा सामाजिक विकास कार्यालय र मुसिकोट नगरपालिकाको आर्थिक सहयोगमा जिल्लाका ३६ जना जेष्ठ नागरिकलाई ५ दिनको मुक्तिनाथ भ्रमण पनि गराइएको थियो ।
