नेपाल विद्युत प्राधिकरण रुकुम पश्चिम वितरण केन्द्र सेवा प्रवाहमा सवोत्कृष्ट हुँदै सम्मानित भएको छ । नेपाल विद्युत प्राधिकरणले आफ्नो ३७ औं वार्षिकोत्सवको अवसरमा देशभरका १७ वटा कार्यालयलाई सर्वोत्कृष्ट घोषित गर्दै कदर पत्रले सम्मान गरेको छ । त्यसमा रुकुम पश्चिम वितरण केन्द्र पनि परेको छ । रुकुम पश्चिम वितरण केन्द्र अन्तरगत सल्यान–रुकुम ३३ के.भी. अपग्रेड तथा मुसीकोट सव स्टेशन सञ्चालन गरी विद्युत वितरण प्रणालीमा उल्लेख्य सुधार गरेको भन्दै रुकुम पश्चिम वितरण केन्द्र सम्मानित भएको हो ।

त्यस्तै विद्युत चुहावट न्युनीकरण गर्न सफल भएकोमा समेत वितरण केन्द्र सम्मानित भएको हो । उक्त कदर पत्र वितरण केन्द्र प्रमुख त्रिलोचन भट्टराईले ग्रहण गर्नुभयो । यो सम्मानले सही कामको मुल्यांकन भएको केन्द्र प्रमुख भट्राईले बताउनुभयो । राम्रो गर्ने प्रयास गरेको र यसैको मुल्यांकन भएको भन्दै उहाँले खुशि समेत व्यक्त गर्नुभयो । साथै उहाँले यो सफलतामा सहयोग गर्ने सम्पूर्णलाई धन्यवाद पनि दिनुभएको छ ।