रुकुम पश्चिमको देउताखोलाले एक बृद्धलाई बगाएको छ । सानीभेरी गाउँपालिका वडा नम्बर ३ गुमाखोलाका ७० वर्षिय दलविर गुरुङलाई आज बिहान करिब ११ बजेतिर देउताखोलाले बगाएको वडा नम्बर ३ का अध्यक्ष जगदिश नकालले जानकारी दिनुभयो । 

घरबाट वडा नम्बर ३ मा रहेको पेदी बजारमा आउँने क्रममा गाउँ नजिकैबाट खोलाले बगाएको स्थानीयले देखेको उहाँले बताउनुभयो । खोला नजिकै बाटोमा हिडिरहेका गुरुङलाई खोलामा आएको बाढीले बगाएको हो । वेपत्ताको खोजी भइरहेको वडाध्यक्ष नकालले बताउनुभयो । 

भारी वर्षाका कारण देउता खोलाको वहाव बढेको छ । खोलाले आसपासको क्षेत्रमा कटान गरेको छ । खोला आसपासका घर, खेत, घट्ट  समेत बगाएको स्थानीयले बताएका छन् । खोला आसपासमा साना ठूला पहिरो समेत गएका छन् ।   

खोलाको बहाब अझै बढ्दो क्रममा रहेकोले वडाले सतर्क रहन वडावासीलाई अनुरोध गरेको छ । देउताखोला सानीभेरी गाउँपालिका वडा नम्बर ५ र ६ र ३ हँुदै  सानीभेरी नदिमा मिसिन्छ ।