कृषि विकास कार्यालय रुकुम पश्चिमले स्थानीय तहमै पुगेर योजनाको सम्झौता सुरु गरेको छ । ‘जहाँ कृषक त्यहाँ कृषि विकास कार्यालय’ भन्ने नाराका साथ चालु आर्थिक वर्ष २०७७/०७८ मा कार्यालय मार्फत कार्यान्वयन हुन लागेका योजनाहरुको कार्यालयले गाउँमै पुगेर उपभोक्ता समितिहरुसंग सम्झौता गर्न सुरु गरेको हो । कर्णाली प्रदेशको भुमि व्यवस्था, कृषि तथा सहकारी मन्त्रालयबाट जिल्लामा कृषि विकास कार्यालय मार्फत कार्यान्वयन हुन लागेका योजनाहरुलाई समयमै सम्पन्न गर्नका लागि कार्यालय सम्झौता गर्न स्थानीय तहमै पुगिरहेको छ ।

ढिलो गरी योजना सम्झौता हुँदा काम असारमै धकेलिने र यसले प्रभावकारी काम नहुने तथा पारदर्शितामा पनि प्रश्न उठ्ने भएकाले समयमै योजना कार्यान्वयनका लागि स्थानीय तहमै पुगेर सम्झौता गर्ने अभियानको सुरुवात गरेको कृषि विकास कार्यालयका निमित्त प्रमुख मीनवहादुर केसीले जानकारी दिनुभयाे । उपभोक्ताहरु सम्झौताका लागि जिल्ला सदरमुकाममा रहेको कार्यालयमा पुग्नुपर्दा झन्झटिलो हुने, खर्चिलो हुने र उपभोक्ताहरुलाई सास्ती हुनबाट जोगाउन पनि स्थानीय तहमै पुगेर सम्झौता गरिरहेको उहाँको भनाई छ ।

सम्झौताका लागि कार्यालयमा पुग्दा हुने खर्चले थप विकास हुने कार्यालयको विश्वास छ । यसबाट उपभोक्ताहरु खुशि भएका छन् । सम्झौताका लागि भनेर सदरमुकाम पुग्नुपर्दाको झन्झट अव हटेको भन्दै बाँफिकोट गाउँपालिका ३ मा रहेको झिम्रु–कोलचौर–वसेनी–छिप्राखोला सिंचाई कुलो निर्माण उपभोक्ता समितिका अध्यक्ष कुलवहादुर खत्रीले खुशि व्यक्त गर्नुभयाे । समितिले सिंचाई कुलो निर्माणका लागि यो वर्ष ५ लाख रुपैंया पाएको र समयमै सम्झौता भएकाले अव समयमै स्टामेट अनुसारको काम सम्पन्न गरिसक्ने उहाँले बताउनुभयाे ।

कृषि विकास कार्यालयले पहिलो चरणमा सिंचाई आयोजनाहरुको सम्झौता गरिरहेको छ । चालु वर्षका जिल्ला भरमा कुल ३० वटा सिंचाईका योजना रहेकामा अहिलेसम्म बाँफिकोटका ५, त्रिवेणिका ३ र मुसीकोटका ३ र आठबीसकोटको १ गरी १२ वटा योजनाको सम्झौता भैसकेको निमित्त कार्यालय प्रमुख केसीले बताउनुभयाे । अव मुसीकोट नगरपालिकाका ६, आठबीसकोट नगरपालिकाका ४, सानीभेरी गाउँपालिकाका ६ र चौरजहारी नगरपालिकाका २ वटा योजनाको सम्झौता हुन बाँकी छ ।

जिल्लामा यो वर्ष कृषि विकास कार्यालय मार्फत संचालन हुन लागेका योजनाहरु कममा ५ लाख देखि बढीमा ७५ लाख सम्मका छन् । यसैगरी सबै स्थानीय तहमा पुगेर कार्तिक पहिलो सातासम्म योजनाको सम्झौता गरिसक्ने र पौष मशान्त भित्र निर्माणका कामहरु सक्ने लक्ष रहेको निमित्त कार्यालय प्रमुख केसी बताउँछन् । गत वर्षहरुमा जस्तो यो वर्ष असार महिनासम्मै निर्माणका काम हुने बाध्यताको अन्त्य हुने उनले दाबि गरे ।

यसैविच कृषि विकास कार्यालयले यो वर्ष संचालन हुने अन्य योजनाहरुको समेत गाउँमै पुगेर सम्झौता गर्ने बताएको छ । सुरुमा प्राविधिक टोली पठाएर लागत स्टामेट तयार पार्ने र त्यसपछि कार्यालयको टोली गएर सम्झौता गर्ने अभियान जिल्लाका ६ वटै स्थानीय तहमा संचालन हुने र कार्यालयबाट संचालन हुने सबै योजनामा लागु हुने बताईएको छ ।