रुकुम पश्चिम प्रहरीले चोरीको आरोपमा एक युवकलाई पक्राउ गरेको छ । जिल्ला सदरमुकाम मुसीकोट खलंगाको कालिकास्थानमा रहेको प्रतिक्षा एण्ड खकेन्द्र मोबाईल मर्मत पसलमा चोरी गरेको आरोपमा प्रहरीले रुकुम पुर्वको पुथाउत्तरगंगा गाउँपालिका वडा नम्बर ९ खाराबाङका २८ वर्षिय सुर्य परियारलाई पक्राउ गरेको हो ।

उनलाई रुकुम पश्चिमको मुसीकोट नगरपालिका ५ सेरिगाउँबाट सोमबार बिहान पक्राउ गरेको जिल्ला प्रहरी कार्यालयले जनाएको छ । मोबाइल पसलमा आईतबार बिहान करिब साढे २ बजेतिर तोडफोड गरी चोरी भएको थियो । चोरी भएको २४ घण्टा नवित्दै चोर पक्राउ गर्न सफल भएको प्रहरीले जनाएको छ । उनका साथबाट चोरी भएका विभिन्न कम्पनीका २० थान मोबाइल समेत बरामद गरिएको जिल्ला प्रहरी कार्यालयले सामाजिक सञ्जाल फेसबुक मार्फत जानकारी गराएको छ ।

सामसुङ, टेक्नो, भिभो लगायत कम्पनीका स्मार्ट तथा कि–प्याड मोबाइल चोरी भएको प्रहरीले जनाएको छ । प्रहरीका अनुसार जिल्ला अदालतबाट म्याद थप गरी घटनाको अनुसन्धान चलिरहेको छ । जिल्ला सदरमुकाममा चोरीका घटना बढ्ेका छन् । केही दिन अगाडी बागबजार क्षेत्रमा चोरी भएको थियो । सदरमुकाम त्यसमा पनि मुख्य बजारमै चोरीका घटना बढेपछि सुरक्षा निकायको आलोचना समेत हुने गरेको छ ।