रुकुम पश्चिमको मुसीकोट नगरपालिका ९, का ३ सय ६ जना वडाबासीको निःशुल्क स्वास्थ्य चेकजाँच तथा उपचार भएको छ । वडा कार्यालयले फागुन ७ र ८ गते निःशुल्क शिविर आयोजना गरी वडाबासीको स्वास्थ्य चेकजाँच तथा उपचारको प्रबन्ध गरेको थियो । स्वास्थ्य चौकी होलतारामा भएको शिविरमा २ सय ४ जनाले आँखा तथा कानको चेकजाँच गराएका छन् ।

जसमध्य ३४ जनाको आँखा अप्रेशन गर्नुपर्ने भएको छ । आँखा जाँचका क्रममा मधुमेहको समस्या देखिएको र उनिहरुको अप्रेशन गर्नुपर्ने आवश्यक्ता देखिएको छ । शिविरमा गएका १ सय २ जनाको रगत जाँच भएको छ । स्वास्थ्यमा समस्या भए नभएको तथा रगतको अवस्था पत्ता लगाउनका लागि शिविरमा रगत जाँच गरिएको हो । 

शिविर मार्फत ४२ जना जेष्ठ नागरिक, १ सय ४२ जना महिला तथा ६२ जना पुरुषले सेवा लिएको वडाध्यक्ष नविन ओलीले जानकारी दिनुभयो । सानो भएपनि गाउँघरमै उपचारको व्यवस्था गर्न भन्दै शिविर आयोजना गरिएको वडाध्यक्ष ओलीले बताउनुभयो । गाउँ गाउँमा सरकार रहेको महशुस गराउन सकेको उपचार सेवा, औषधी तथा स्वास्थ्य परामर्शका लागि बेला बेला वडा कार्यालयले यसरी नै शिविर गराइरहेको उहाँले जानकारी दिनुभयो ।

शिविरमा नेत्रज्योती सहायक धनबहादुर केसी, गोपाल ओली, ल्याब टेक्निसियन सर्वजित खड्का, देवराज महतरा, झरना बराइली, स्वास्थ्य चौकी इन्चार्ज डिल्लीराज बोहरा, अनमी मुना पुन, अहेब हरि विष्ट लगायतको टोली खटिएको थियो । शिविरमा नेत्रजोति संघ, आँखा अस्पताल सल्ले, साझा मुराल अस्पताल खलंगा , प्रयोगशला केन्द्र झुल्खेत, स्वास्थ्य चौकी चौखावाङको प्राबिधिक सहयोग थियो ।