रुकुम पश्चिमको मुसीकोट नगर कार्यपालिकाका १७ जना सदस्यहरुले तत्काल कार्यपालिका बैठक बोलाउन आग्रह गरेका छन् । नयाँ आर्थिक वर्ष २०७९/०८० सुरु भएपछि एउटा पनि कार्यपालिका बैठक बस्न नसकेको र महत्वपूर्ण निर्णयहरु हुन नसकेको भन्दै उपप्रमुख सहित बहुमत कार्यपालिका सदस्यहरुले आज देखि तीन दिन भित्र कार्यपालिका बैठक बोलाउन आग्रह गरेका हुन् ।
श्रावण देखि हालसम्म कुनैपनि बैठक बस्न नसकेको र जसका कारण नगरपालिकाको प्रशासनिक तथा दैनिक कामकाज सञ्चालनमा समेत असहजता पैदा भएकोले स्थानीय सरकार सञ्चालन ऐन २०७४ बमोजिम तीन दिन भित्र नगर कार्यपालिका बैठक बोलाउन बहुमत नगर कार्यपालिका सदस्यहरुले अल्टिमेटम दिएका छन् । साथै उनिहरुले बैठकका एजेण्डाहरु पनि तय गरेका छन् ।
शिक्षा शाखा प्रमुख बिनाराम खड्कालाई निमित्त प्रमुख प्रशासकीय अधिकृत तोक्दा कार्यपालिकाको निर्णय अनुसार भनि पत्र लेखिएको, उपसचिवको दरबन्दी कायम भएको नगरपालिकामा उपसचिव हाँजिर हुन आउँदा हाँजिर गराउन नसकिने भनि पत्र लेखिएको, कर्मचारीको सहमति अनुमति दिईएको र कार्यपालिकाका निर्णय बिना भएका ठेक्का टेण्डरलाई कार्यपालिका बैठकका एजेण्डा बनाउन उनिहरुले भनेका छन् ।
आज नगर प्रमुख महेन्द्र केसीलाई पत्र बुझाउँदै बहुमत कार्यपालिका सदस्यहरुले नगर प्रमुख एकलौटी रुपमा अगाडी बढ्न खोजेको आरोप पनि लगाएका छन् । नगर उपप्रमुख विमलकुमार पुनले नगरपालिका संस्थागत रुपमा अगाडी बढ्नुपर्ने बताउनुभयो । एकलौटी रुपमा हिड्ने कुराले कसैलाई फाइदा नगर्ने र त्यसो गर्न खोजिए आफुहरु चुप लागने नबस्ने उहाँले चेतावनी दिनुभयो ।
कार्यपालिका बैठक पनि बोलाउनुहोस् भनेर भन्नु लाजमर्दो विषय भएको मुसीकोट १२ का वडाध्यक्ष धिरन शिर्पालीले बताउनुभयो । कार्यपालिका बैठक बोलाउने मेयरको अधिकार भएको र नयाँ आर्थिक वर्ष सुरु भएको लामो समयसम्म पनि कार्यपालिका बैठक नबसेका कारण बाध्य भएर बैठक बोलाउ भनेर भन्ने अवस्था आएको उहाँको भनाई छ ।
आगामी दिनमा सयौं बैठकहरु बस्नुपर्ने भएपनि नगर प्रमुख अहिले देखि नै एकपक्षिय रुपमा अगाडी बढ्न खोज्नु र बैठक नै नबोलाउनु राम्रो कुरा नभएको उहाँको भनाई छ । नगर प्रमुख महेन्द्र केसीले छिट्टै कार्यपालिका बैठक बोलाउने कार्यपालिका सदस्यहरुलाई आश्वासन दिएको वडा नम्बर १० का वडाध्यक्ष धनबहादुर खड्काले बताउनुभयो । कार्यपालिका बैठक बिना महत्वपूण प्रशासनिक र नीतिगत काम गर्दै जाने तर प्रत्यक्ष जनतासंग जोडिएका काम गर्नुपरेमा भने माओवादी र समाजवादीले काम गर्न दिएनन्, बैठक बस्न दिएनन् भनेर अपवाह फैलाउने काम भएकोले पनि तत्काल बैठक बोलाउन भनेको उहाँले बताउनुभयो ।
नगर प्रमुखले एकलौटी गरेको भन्दै यसअघि नेकपा एकीकृत समाजवादी र नेकपा माओवादी केन्द्रबाट निर्वाचित कार्यपालिका सदस्यहरुले समन्वय नगरिएका कार्यक्रम बहिष्कारको घोषणा गरेका थिए ।
