विभिन्न महत्त्वपूर्ण निर्णय पारित गर्दै सिस्ने गाउँपालिकाको ८ औँ गाउँ कार्यपालिका बैठक सम्पन्न भएको छ । गाउँपालिका अध्यक्ष कृष्ण रेग्मीको अध्यक्षतामा सम्पन्न कार्यपालिका बैठकले १२ वटा निर्णय पारित गरेको छ । बैठकमा एक सय दिनको अवधिमा नयाँ जनप्रतिनिधि मार्फत सम्पादन भएका विभिन्न महत्त्वपूर्ण कामको प्रगति समीक्षा गरिएको हो । अवको केहि दिनमा पत्रकार सम्मेलन मार्फत एक सय दिनमा सम्पन्न भएका कामको बारेमा जानकारी गराउने निर्णय समेत बैठकले गरेको छ ।
गाउँपालिकाको शैक्षिक गुणस्तर सुधारका लागि प्राधानाध्यापकसँग गरिने सम्झौता पत्रको नमुना पनि बैठकले स्वीकृत गरेको गाउँपालिकाका प्रवक्ता कृष्ण खड्काले कखरालाई जानकारी दिनुभयो । कखरासँग कुराकानी गर्दै प्रवक्ता खड्काले उक्त सम्झौता पत्र आगामी बस्ने प्राधानाध्यापक बैठकमा हस्ताक्षर गराई कार्यान्वयनका लागि करार सम्झौता गर्ने निर्णय पनि भएको छ ।
यस्तै शिक्षाको पहुँच तथा गुणस्तर सुधारका लागि चालु आर्थिक वर्षमा विशेष अनुदान मार्फत प्राप्त भएको एक करोड र गरिबी निवारणका लागि लघु उद्यम विकास कार्यक्रम मेडपा सञ्चालनको लागि संघीय सरकारबाट सशर्त अनुदान मार्फत प्राप्त ३४ लाख रुपैयाँ बजेट कार्यान्यनका लागि स्वीकृत गरिएको छ । बैठकले युवा विकास केन्द्र लागि विनियोजन गरिएको ९ लाख रुपैयाँ बजेट पनि कार्यान्वयनका लागि पारित गरेको छ ।
प्रवक्ता खड्काका अनुसार दीर्घकालीन एकिकृत फोहोर व्यवस्थापन तथा रुलिखोला ढल निकास गर्न डीपीआर तयार गरी फोहोर व्यवस्थापनलाई अघि बढाउन २० लाख रुपैयाँ खर्च गर्ने निर्णय पनि भएको छ । १ नम्बर वडाको आधारभूत स्वास्थ्य इकाइ पाखापानीलाई सञ्चालन गर्न एक जना कर्मचारी व्यवस्थापन गर्ने निर्णय भएको उहाँले बताउनुभयो । रुकुमकोट बसपार्कमा प्रहरी विट स्थापनाको लागि भौतिक संरचना निर्माणमा भएको खर्च सुरक्षा व्यवस्थापन शीर्षकबाट प्रदान गर्ने निर्णय पनि कार्यपालिका बैठकबाट पारित भएको छ ।
सुरक्षित नागरिक आवास कार्यक्रम अन्तर्गत सम्झौता अनुसार काम सम्पन्न गरेका निवेदन माथी छानविन गरी भुक्तानी दिने र प्राकृतिक विपदबाट क्षति भइ पुनः निर्माण गरिएको ३ नं वडा कार्यालयको मर्मत खर्च प्रदान गर्ने निर्णय भएको छ ।
यस्तै अति विपन्न भई उपचार खर्च समेत व्यहोर्न नसकेका ५ विरामीलाई उपचार खर्च प्रदान गर्ने निर्णय बैठकले पारित गरेको छ । कार्यपालिका बैठकको निर्णय अनुसार ति विरामीले तीन देखि दश हजार रुपैयाँ उपचार खर्च पाउने भएका छन् ।
