रुकुम पश्चिमको मुसिकोट नगरपालिका वडा नम्बर १ खलंगामा आयोजित खुला वडा स्तरीय पुरुष भलिबलको उपाधि सानीभेरी गाउँपालिका वडा नम्बर ७ ले जितेको छ । आज भएको फाइनलमा जिल्लाको बाँफिकोट गाउँपालिका वडा नम्बर ३ लाई २–० को सोझो सेटमा पराजित गर्दै सानीभेरी गाउँपालिका ७ ले उपाधि जितेको हो । 

विजेता सानीभेरी ७ ले नगद १ लाख सहित ट्रफि जितेको छ । उपविजेता बनेको बाँफिकोट ३ ले नगद ५० हजार र ट्रफिमा चित्त बुझाएको छ । त्यस्तै प्रतियोगितामा रुकुम पश्चिमकै त्रिवेणी गाउँपालिका वडा नम्बर ४ तृतिय भएको छ । आजै तेस्रो स्थानका लागि भएको खेलमा बाँफिकोट गाउँपालिका वडा नम्बर २ लाई २–१ को सेटमा पराजित गर्दै त्रिवेणी ४ तृतिय भएको हो । 

तृतिय भएको त्रिवेणीले नगद ३० हजार र ट्रफि हात पारेको आयोजक पश्चिम रुकुम भलिबल प्रशिक्षण केन्द्रका अध्यक्ष तेज बुढाले जानकारी दिनुभयो । प्रतियोगितामा रुकुम पश्चिम, रुकुम पूर्व र रोल्पाका गरी २९ वटा वडाले प्रतिस्पर्धा गरेका थिए । २६ गतेबाट सुरु भएको प्रतियोगिता हिजो सक्ने लक्ष राखिएकोमा मौसमका कारण आजसम्म लम्बिएको थियो । 

आज पनि बिहानैबाट लगातार पानी पर्न थालेपछि पानी पानी सेमिफाइनल, तेस्रो स्थान र फाइनल संचालन गरिएको थियो । भलिबल विकासमा टेवा पुर्याउने भन्दै पश्चिम रुकुम भलिबल प्रशिक्षण केन्द्रले प्रतियोगिता आयोजना गरेको हो ।