रुकुम पश्चिमको मुसीकोट नगरपालिकाका उपप्रमुख सहित असन्तुष्ट बुहमत कार्यपालिका सदस्य सम्मिलित नगर कार्यपालिका बैठक बसेको छ । नगर उपप्रमुख विमलकुमार पुनको अध्यक्षतामा असन्तुष्ट १७ जना कार्यपालिका सदस्यहरु सम्मिलित बैठक बसेको हो । भाद्र ३० गते बसेको बैठकले विभिन्न काम अगाडी नबढाउन प्रमुख प्रशासकीय अधिकृत र सबै शाखाहरुलाई निर्देशन दिएको छ ।
लामो समयदेखि नगर कार्यपालिका बैठक बस्न नसकेको अवस्थामा नगरकार्यपालिका वैठक वसी सहज रुपमा नगरको कामकाज गर्ने वातावरणको सृजना नभएसम्मका लागि विभिन्न कामकाजहरु अगाडी नबढाउन बैठकले निर्देशन दिएको हो । बैठकले रोतो कितावमा समावेश योजनाहरुको सम्झौता नगर्न र कुनैपनि टेण्डरहरुको सूचना प्रकाशन तथा सम्झौता नगर्न भनेको छ ।
त्यस्तै नगरपालिकामा कर्मचारीहरुको सरुवाको लागि सहमति तथा अनुमति दिने तथा बढुवा नगर्न, कुनैपनि प्रकारको भुक्तानी नगर्न र हाल नगरकार्यपालिकाको कार्यालय भित्र विभिन्न शाखाहरुमा कार्यरत कर्मचारीहरुको जिम्मेवारी परिवर्तन नगर्न पनि वहुमत कार्यपालिका सदस्य सम्मिलित बैठकले प्रमुख प्रशासकीय अधिकृत र नगरभित्रका सम्पूर्ण शाखाहरुलाई निर्देशन दिएको छ ।
यता नगर प्रमुख महेन्द्र केसीले भने यो वैठक अवैधानिक रहेको र यसको कुनै तुक नरहेको बताउनुभयो । स्थानीय सरकार संचालन ऐन २०७४ अनुसार नगरकार्यपालिका बैठक बोलाउने, बैठकका एजेण्डा प्रस्ताव गर्ने अधिकार नगर प्रमुखको रहेको र नगर उपप्रमुखको अध्यक्षतामा कार्यपालिका बैठक वस्ने व्यवस्था कतै नभएकोले यो बैठकको कुनै तुक नरहेको उहाँले बताउनुभयो ।
एउटा समुह विधिको शासनभन्दा बाहिर गएर उपध्रो मच्चाइरहेको उहाँको भनाई छ । उपप्रमुख सहित बहुमत कार्यपालिका सदस्यहरुले लगातार माग गरेपछि मुसीकोट नगरकार्यपालिकाको पछिल्लो बैठक भाद्र २९ गते बसेको थियो । तर उक्त वैठक विना निष्कर्ष स्थगित भएको थियो । बहुमत कार्यपालिका सदस्यहरुले आफुहरुले नगरप्रमुखलाई कार्यपालिका बैठकको माग गर्दा बुझाएका एजेण्डा समावेश नभएको भन्दै बैठकको सुरुमै विरोध जनाएका थिए ।
चर्काचर्कीपछि हात हालाहालसम्मको अवस्था सृजना हुनसक्ने देखिएपछि बैठक स्थगित गर्नुपरेको नगर प्रमुख केसीले बताउनुभयो । तर नगर उपप्रमुख विमलकुमार पुनले भने बैठकमा छलफल चलिरहेको बेला नगर प्रमुख बैठक स्थगित भयो भनेर हिडेको बताउनुभयो । महत्वपूर्ण विषयमा छलफल गर्नुपर्ने बैठक स्थगित भयो भनेर नगर प्रमुख गएपछि आफ्नो अध्यक्षतामा वहुमत सदस्यहरुको बैठक बसेको उहाँले बताउनुभयो ।
स्थानीय सरकार संचालन ऐन २०७४ अनुसार महिनामा कम्तिमा एक पटक बैठक बस्नुपर्ने व्यवस्था रहेको तर नयाँ आर्थिक वर्ष सुरु भएको तीन महिनासम्म पनि बैठक नबोलाएपछि आफुहरुले बाध्य भएर बैठक डाक्न नगर प्रमुखलाई आग्रह गरेको उहाँले बताउनुभयो । उक्त आग्रह अनुसार भाद्र २९ गते बैठक बसेपनि विचमै बैठक स्थगित गरेपछि अवस्था सामान्य नहुँदासम्म महत्वपूर्ण कामहरु नगर्न आफुहरुले प्रमुख प्रशासकीय अधिकृत र शाखाहरुलाई आग्रह गरेको उहाँको भनाई छ ।
मुसीकोट नगरपालिकामा एकीकृत समाजवादी र माओवादी केन्द्रको बहुमत छ । नगरपालिकामा सुरुबाट नै एक पक्षले अर्को पक्षलाई आरोप प्रत्यारोपको सिलसिला चलिरहेको छ । जसका कारण नगरका महत्वपूर्ण नीतिगत तथा प्रशासनिक कामकाजमा असर परेको छ ।
