राष्ट्रिय प्रगतिशिल स्वास्थ्यकर्मी संगठन रुकुम पश्चिमले दशैं, तिहार तथा छट पर्व जस्ता चाडको अवसरमा शुभकामना आदान प्रदान तथा चियापान कार्यक्रम गरेको छ । संगठनले मुसीकोट नगरपालिका वडा नम्बर ५ को सहिद प्रतिष्ठानको हलमा कार्यक्रम संचालन गरेको हो । 

कार्यक्रमको अवसरमा विशेषज्ञ डाक्टर र पूर्व स्वास्थ्यकर्मीलाई सम्मान गरिएको छ । जिल्ला अस्पतालमा कार्यरत विशेषज्ञ डाक्टर शुशिल पोख्रेल र केहलविक्रम जिसीलाई सम्मान गरिएको हो । त्यस्तै जनप्रतिनिधि बनेका हरि चन्द र रामकुमार गौतमलाई सम्मान गरिएको संगठनका जिल्ला अध्यक्ष डिल्लीराज बोहराले जानकारी दिनुभयो । 

चन्द बाँफिकोट गाउँपालिका वडा नम्बर १० का अध्यक्ष हुनुहुन्छ भने गौतम जिल्ला समन्वय समिति रुकुम पश्चिमको सदस्य हुनुहुन्छ । प्रमुख जिल्ला अधिकारी परमानन्द घिमिरेले प्रशंसा पत्रले सम्मान गर्नुभयो । 

कार्यक्रममा नेकपा माओवादी केन्द्रका पोलिटब्युरो सदस्य राजकुमार शर्मा, केन्द्रीय सदस्य वसन्तकुमार शर्मा, गोपाल शर्मा, महेन्द्र केसी, प्रमुख जिल्ला अधिकारी परमानन्द घिमिरे, माओवादी केन्द्रका जिल्ला संयोजक गोविन्द रोका लगायतको आतिथ्यता रहेको थियो ।