सत्तागठबन्धन भित्र सत्ता बाँडफाँडको रसाकसी चलिरहेका बेला नेकपा माओवादी केन्द्र रुकुम पश्चिमले मुख खोलेको छ । सिट बाँडफाँडको विषय उत्कर्षमा पुगेका बेला माओवादी केन्द्र रुकुम पश्चिमले जिल्लाका सबै सिट आफुले पाउनुपर्ने बताएको छ । 

जिल्ला संयोजक गोविन्द रोका सचिनले सामाजिक सञ्जाल फेसबुक मार्फत प्रतिनिधि सभाको एक र प्रदेश सभाका दुई वटै क्षेत्र माओवादीले पाउनुपर्ने अन्यथा अनपेक्षित हुनसक्ने भन्दै ध्यानाकर्षण गराउनुभएको छ । ‘जितेका क्षेत्र यथावत राखि अन्य क्षेत्र बाँडफाँड गर्ने भनि यसअघि निर्धारण गरिएको मापदण्ड अनुसार नै निर्णय गर्न नेकपा माओवादी केन्द्र रुकुम पश्चिम जोडदार माग गर्दछ, उहाँले लेख्नुभएको छ ।’

अन्यथा भएमा रुकुम पश्चिममा त्यसको परिणाम अनपेक्षित हुन सक्ने तर्फ सम्बन्धित पक्षको गंभीर ध्यानाकर्षण गराउन चाहन्छौं, उहाँले थप लेख्नुभएको छ । सिट बाँडफाँडको रसाकसी चलिरहेका बेला जिल्ला संयोजकको यस्तो धारणा आउनुलाई अर्थपूर्ण रुपमा लिईएको छ । २०७४ सालको प्रतिनिधि र प्रदेशसभाको चुनामा जिल्लाका सबै ३ वटै क्षेत्रमा माओवादीले जितेको थियो ।