रुकुम पश्चिमको बाँफिकोट गाउँपालिका वडा नम्बर ३ मा आयोजित ११ औं स्यार्पू पर्यटन मेला अन्तरगत खुला महिला तथा पुरुष ब्याडमिन्टन प्रतियोगिता सम्पन्न भएको छ । पुरुष तर्फ जीवन बोहरा र नबिन बोहराको जोडी पहिलो भएको छ । आज भएको फाइनलमा कमल दाहाल र चन्द्रबहादुर केसीको जोडीलाई पराजित गर्दै जीवन र नबिनको जोडी पहिलो बनेको हो । २१ जोडीले प्रतिस्पर्धा गरेको प्रतियोगितामा इश्वर रावल र बिशाल बिष्टको जोडी तेस्रो बनेको छ । 

यस्तै ८ जोडीले प्रतिस्पर्धा गरेको महिला ब्याडमिन्टनमा आशा केसी र कोपिलाा गुरुङको जोडी पहिलो बनेको छ । शारदा चन्द र निर्मला विक मल्लको जोडीलाई पराजित गर्दै आशा र कोपिलाको जोडी पहिलो भएको हो । डिला पुन र रामकुमारी बिष्टको जोडी तेस्रो भएको छ । यो जोडीले टिका डाँगी र रमिता मल्लको जोडीलाई पराजित गरेको हो ।

प्रतियोगिताको पुरस्कार महिला पुरुषको समान छ । प्रथमले १० हजार, द्धितियले ८ हजार तृतियले ६ हजार पुरस्कार पाएको आयोजक स्यार्पू युवा तथा खेलकुद विकास समितिले जनाएको छ ।