उम्मेदवारको अन्तिम नामावली प्रकाशन भएपछि दलहरु चुनावी प्रचारमा निस्किएका छन् । रुकुम पश्चिममा सत्ता गठबन्धन, नेकपा एमाले, राप्रपा र केही स्वतन्त्र उम्मेदवार चुनावी मैदानमा रहेका छन् । गठबन्धनले आगामी निर्वाचन लक्षित घरदैलो सुरु गरेको छ । 

पार्टीका उम्मेदवारहरुलाई एक चरण घरदैलोमा निस्किन भनेको नेकपा माओवादी केन्द्रका पोलिटब्युरो सदस्य तथा जिल्ला निर्वाचन परिचालन समितिका संयोजक गोपाल शर्मा अनलले रेडियो सानीभेरीलाई जानकारी दिनुभयो । निर्वाचनलाई लक्षित गरेर प्रदेश सभाका उम्मेदवार घरदैलोमा निस्किएको उहाँले बताउनुभयो । 

प्रतिनिधि सभा र प्रदेश सभा दुईवटै तहको निर्वाचनलाई लक्षित गरेर घरदैलो सुरु भएको शर्माले बताउनुभयो । अर्थमन्त्री समेत रहनुभएका प्रतिनिधि सभा सदस्यका उम्मेदवार जनार्दन शर्मा भने केही दिनमा जिल्ला आउने बताइएको छ । उहाँ हाल अमेरिकामा रहनुभएको छ । 

प्रदेश सभा क तर्फ गठबन्धनका तर्फबाट उम्मेदवार महेन्द्र केसी र प्रदेश सभा ख का उम्मेदवार राजकुमार शर्मा भने घरदैलोमा निस्किसक्नुभएको छ । प्रदेश क का उम्मेदवार केसी भने पार्टीले उम्मेदवार सिफारिस गरेदेखि नै घरदैलोमा हुनुहुन्छ । 

पार्टीका तर्फबाट घरदैलो सुरु गरेपनि गठबन्धनका तर्फबाट कसरी चुनावी अभियान संचालन गर्ने भनेर छलफलको क्रममै रहेको निर्वाचन परिचालन समिति संयोजक शर्माले बताउनुभयो । कांग्रेस उम्मेदवारले बुधबार उम्मेदवारी फिर्ता लिएर गठबन्धनलाई समर्थन गरेको र अव कसरी अगाडी बढ्ने भनेर छलफल गरेर अगाडी बढ्ने उहाँको भनाई छ ।  

नेकपा एमालेले पनि चुनावी प्रचार सुरु गर्दै छ । यसबारेमा आज निर्वाचन परिचालन समितिको बैठक बसेको छ । उक्त बैठकले एमालेको नीति, विचार र सिद्धान्तलाई लिएर जनताको विचमा जाने निर्णय गरेको नेकपा एमालेका जिल्ला अध्यक्ष तथा प्रतिनिधि सभा सदस्य उम्मेदवार नन्दराम देवकोटाले जानकारी दिनुभयो । ‘५ दलिय गठबन्धन ढुक्क संग प्रचारमा जुटेको छ, हामी पनि ढुक्क भएर जनताको विचमा जान्छौं, उहाँले भन्नुभयो ।’

एमालेले प्रतिनिधिसभामा देवकोटा र प्रदेश क मा नारायणकुमार शाह तथा ख मा कर्णबहादुर घर्तीलाई उम्मेदवार बनाएको छ । राप्रपाले पनि चुनावी प्रचारलाई तिव्रता दिने बताएको छ । त्यस्तै प्रतिनिधि सभामा जिल्लाबाट तारक केसी र राजन पाण्डे गरी २ जनाले स्वतन्त्र उम्मेदवारी दिएका छन् । 

आफु पनि अव चुनावी प्रचारमा केन्द्रीत भएको स्वतन्त्र उम्मेदवार तारक केसीले बताउनुभयो । जिल्लामा एक प्रतिनिधि र २ प्रदेश सभा सदस्यका लागि मंसिर ४ गते चुनाव हुँदै छ । जिल्लामा १२ जना चुनावी मैदानमा रहेका छन् ।