रुकुम पूर्व निर्वाचन क्षेत्र नम्बर ‘क’ का प्रत्यक्ष तर्फका उम्मेदवार तेजबहादुर ओलीको टोलीलाई स्वतन्त्र उम्मेदवारका समर्थकले रोकेका छन् । चुनावि प्रचारका लागि पुथाउत्तरगंगा गाउँपालिकाका विभिन्न वडाका लागि निस्किएको टोलीलाई सोही क्षेत्रबाट स्वतन्त्र उम्मेदवारी दिएका सुरुल पुनका समर्थकले रोकेका हुन् । 

पुथाउत्तरगंगा गाउँपालिका वडा नम्बर १० र ११ तकसेराका स्थानीयले उम्मेदवार ओलीको टोलीलाई तकसेरा प्रवेश गर्न नदिने तयारी गरेपछि ओलीको टोली विच बाटोबाट निर्धारित भन्दा फरक ठाउँ तर्फ लागेको छ । यो टोली पुथाउत्तरगंगा गाउँपालिका वडा नम्बर ६ को मयाङका लागि निस्किएको थियो । उक्त ठाउँ पुग्न तकसेरा हुँदै जानुपर्छ । 

तर तकसेराका स्थानीयले दिखिउँ डाँडामा जम्मा भएर त्यो भन्दा अगाडी जान नदिने तयारी गरेपछि उम्मेदवार ओली नेतृत्वको टोली केही समय क्युवाङमै रोकिएको थियो । तकसेरा प्रवेश गर्ने अवस्था नदेखेपछि उक्त टोली वडा नम्बर १२ को कोल तर्फ लागेको छ । ओलीको टोली आज वडा नम्बर ६ को मयाङ पुग्ने र भोली स्थानीय गठबन्धन दलका नेताहरुसंग छलफलको कार्यक्रम थियो । 

आज अगाडी बढ्नसक्ने अवस्था नभएपछि कोल तर्फ लागेको उम्मेदवार ओलीले बताउनुभयो । सहजिकरणको प्रयास भइरहेको उहाँले बताउनुभयो । 

तकसेराका स्थानीयले ओलीले आफ्ना मुद्दा नउठाएको आरोप लगाएका छन् । ५ वर्षसम्म प्रदेश सभा सदस्य हुँदा आफुहरुका मुद्दामा मौन बसेको पुथाउत्तरगंगा १० तकका मुलमान बुढाले आरोप लगाउनुभयो । विशेष गरी सदरमुकामका विषयमा मौन बसेकामा उक्त क्षेत्रका स्थानीय रुष्ट छन् । 

२०७४ सालमा देउवा नेतृत्वको सरकारले रुकुम पूर्वको सदरमुकाम पुथाउत्तरगंगा गाउँपालिका वडा नम्बर १२ को गोलखाडालाई तोकेको थियो । तर यसका विरुद्ध सर्वोच्च अदालतमा मुद्दा परेपछि सदरमुकाम सार्ने निर्णय कार्यान्वनय हुन सकेको छैन् । अहिले उक्त मुद्दा सर्वोच्च अदालतको संवैधानिक इजलासमा विचाराधिन छ । 

यस विषयमा सांसद हुँदा ओली मौन बसेकोले उहाँलाई अव कुनैपनि हालतमा सांसद बनाएर पठाउन आफुहरु तयार नरहेको बुढाले बताउनुभयो । साथै उहाँले ओलीले निर्वाचन आचारसंहिता उल्लंघन गरेको आरोप पनि लगाउनुभयो । निर्वाचन आयोगले कार्तिक १७ गते अघि निर्वाचन प्रचार नगर्नु भनेपनि ओली प्रचारमा लागेकोले समेत रोकेको उहाँको भनाई छ । 

यो क्षेत्र गठबन्धनका तर्फबाट माओवादीलाई भाग परेको छ । माओवादीले तेजबहादुर ओलीलाई दास्रो पटक टिकट दिएको छ । यसबाट असन्तुष्ट बनेर माओवादीकै सुरुल पुनले स्वतन्त्रबाट उम्मेदवारी दिनुभएको छ । मगर बाहुल यस क्षेत्रका माओवादीकै अधिकांश मगर नेताहरु पुनलाई समर्थन गर्दै खुलेरै लागेका छन् ।