आगामि मंसिर ४ गते हुने प्रतिनिधि र प्रदेश सभा निर्वाचनको लागि रुकुम पश्चिममा कार्तिक १८ गते देखि मंसिर १ गतेसम्म मतदाता शिक्षा कार्यक्रम सञ्चालन हुने भएको छ । निर्वाचन आयोगको कार्यक्रम अनुसार कार्तिक १८ गते देखि मंसिर १ गतेसम्म मतदाता शिक्षा कार्यक्रम सञ्चालन गर्न लागिएको हो ।

निर्वाचन आयोगले वडा वडामा मतदाता शिक्षा कार्यक्रम सञ्चालन गर्ने भने पनि रुकुम पश्चिममा भने वडा हुदैँ टोल टोलसम्म सञ्चालन गरिने जिल्ला निर्वाचन अधिकारी कुमारी रिमा मल्लले जानकारी दिनुभयो । उहाँका अनुसार वडा हुदैँ टोल टोलसम्म महिला स्वयंसेविकाले मतदाताहरुलाई मतदान कसरी गर्ने, के भएमा मतपत्र बदर हुन्छ भन्ने लगायतका विषयमा शिक्षा दिनेछन् । 

मतदाता शिक्षा अन्तर्गत जिल्लाका ६ वटै पालिकामा नमूना मतदान कार्यक्रम पनि सञ्चालन गरिनेछ । नमूना मतदान भने प्रत्यक पालिकामा एक÷एक वटा हुने छन् । नमूना मतदानबाट मतदान कसरी गर्ने, मतपत्र कसरी पट्याउने, मत पेटिकामा मत कसरी खसाल्ने लगायतका विषयमा मतदातालाई बुझाईने छ । मतदानका बारेमा मतदातालाई राम्ररी बुझाउन सकिएमा आगामि निर्वाचनमा मत खेर जाने जोखिमलाई कम गर्न सकिने भएकोले नमूना मतदानको कार्यक्रम रहेको जिल्ला निर्वाचन अधिकारी मल्लको भनाई छ ।

सकेसम्म छिट्टै नमूना मतदान कार्यक्रम सञ्चालन गरिने जिल्ला निर्वाचन कार्यालय रुकुम पश्चिमले जनाएको छ । गत वैशाख ३१ गते भएको स्थानीय तह निर्वाचनमा भने  जिल्लामा एउटा मात्रै नमूना मतदानको कार्यक्रम भएको थियो ।।