रुकुम पश्चिमको प्रसिद्ध धार्मिक डिग्रे मेलाको दोस्रो दिन आज पनि बिहानैबाट डिग्रे शाइकुमारी मन्दिरमा भक्तजनको भिड लागेको छ । हरेक वर्षको हरिबोधननी एकादशी देखि कार्तिक पूर्णिमासम्म लाग्ने मेला हिजो देखि सुरु भएको थियो । हिजो पहिलो दिन पुजाआजा मात्र भएको मन्दिरमा आज देखि बोकाको बलि समेत दिन सुरु गरिएको छ । 

एकादशी र पूर्णिमाको दिन बाहेक मेलाको अवधिमा अन्य दिन बलि सहित पुजाआजा गर्ने गरिन्छ । मुसीकोट नगरपालिका ५, थर्पुमा रहेको डिग्रे शाइकुमारी मन्दिर परिसरमा यो वर्ष कार्तिक १८ गतेबाट सुरु भएको मेला कार्तिक २२ गते भव्य रुपमा सम्पन्न हुने डिग्रे मन्दिर मेला व्यवस्थापन समितिले जनाएको छ ।  

यो मन्दिरमा वर्षैभर पूजाआजा र बलि चढाउने भएपनि हरिबोधनी एकादशी देखि पूर्णिमासम्म विशेष तरिकाले पूजाआजा हुन्छ भने मनोकांक्षा पूरा हुने विश्वास सहित बोकाको बली चढाउने गरिन्छ । यो जिल्ला तथा कर्णाली प्रदेशकै ठूलो धार्मिक मेला हो । 

यस मन्दिरमा रुकुम पश्चिम संगै छिमेकी जिल्ला रुकुम पूर्व, जाजरकोट, सल्यान, रोल्पा, दाङ संगै अन्य जिल्लाका हजारौं भक्तजनहरु पनि मेला भर्न तथा दर्शनका लागि आउने गर्दछन । यस मन्दिरमा दर्शन तथा पुजाआजा गर्नाले मनले चिताएको पूरा हुने धार्मिक विस्वास रहेको छ ।