रुकुम पश्चिमको प्रमुख डिग्रे मेला आज सम्पन्न भएको छ । ५ दिन अघि कार्तिक १८ गते हरिबोधनी एकादशीका दिन देखि सुरु भएको मेला आज सकिएको हो । मेलाको अन्तिम दिन आज मुसिकोट नगरपालिका वडा नम्बर ५ थुर्पूमा अवस्थित डिग्रे शाइकुमारी मन्दिर परिषरमा भव्य मेला लागेको छ । 

आज बिहानै देखि मेला भर्नका लागि रुकुम पश्चिमका गाउँ गाउँ तथा छिमेकी जिल्लाहरुबाट समेत मान्छेहरु मेला स्थलमा पुगेका थिए । यो वर्ष करिब डेढ लाखले मेला भर्नुका साथै मन्दिरमा पुजाआजा, दर्शन र बलि दिएको मन्दिर व्यवस्थापन समितिले जनाएको छ । हरेक वर्ष करिब करिब उस्तै उस्तै हाराहारीमा दर्शनार्थिहरु मेलामा पुग्ने गरेको मन्दिर व्यवस्थापन समितिले जनाएको छ । 

मन्दिर व्यवस्थापन समितिका पूर्व सचिव केदार गौतमका अनुसार रुकुम पश्चिम सहित रुकुम पूर्व, रोल्पा, सल्यान, जाजरकोट, दाङ, सुर्खेत लगायत जिल्लाका दर्शनार्थीहरु पुजाआजा, दर्शन, बलि दिन तथा मेला भर्न पुगेका छन् । त्यस्तै यो वर्ष मन्दिरमा करिब ११ सय बोकाको बलि चढाइएको मन्दिर व्यवस्थापन समितिले जनाएको छ ।

यो गतवर्षको तुलनामा डेढ सयले कम हो । गतबर्षको मेलामा १२ सय ६५ वटा बलि चढाइएको थियो । यो वर्ष दशैं, तिहार देखि नै बलि चढाएका कारण मेलाको अवसरमा केही कम बलि चढेको मन्दिर व्यवस्थापन समितिले जनाएको छ । डिग्र शाइकुमारीको पुजापाठ, दर्शन तथा मन्दिरमा बलि चढाएमा मनोकांक्षा पुरा हुने धार्मिक विश्वास रही आएको छ । 

मन्दिरमा वर्षैभरि पुजापाठ तथा दर्शन गर्न मिल्छ । तर हरेक वर्षको हरिबोधनी एकादशी देखि कार्तिक पूर्णिमासम्मको सयमलाई भने विशेष मानिन्छ । मन्दिरमा हरेक वर्ष ५ दिन विशेष पुजाआजा, बलि र दर्शन गर्ने गरिन्छ । मेलाको अन्तिम दिन मन्दिर परिषरमा भव्य मेला संगै डिग्रे मेला सम्पन्न हुन्छ । 

मेलामा विभिन्न स्थानीय नाच तथा झाँकी र पराम्परागत अनौठो सगाल नाच प्रदर्शन गरिन्छ । मुसिकोट नगरपालिकाको साँख र आसपासका क्षेत्रबाट बाजागाजा सहित हात हातमा लठ्ठी लिएर आएका व्यक्तिहरु मेलामा लठ्ठी नचाएर नाँच्छन् । मन्दिरलाई भूत प्रेटबाट जोगाउन यो नाचको सुरुवात भएको मानिन्छ । यो नाच नाचेसंगै मेला औपचारिक रुपमा समापन हुन्छ ।