सिस्ने गाउँपालिका २ नम्बर वडा दतकुनामा सामुदायिक घट्ट बनाइएको छ । विद्युतबाट सञ्चालन गर्ने गरी ५ लाखको बजेटबाट उक्त घट्ट बनाइएको हो । यस अघि स्थानीयहरु घट्ट पिस्नका लागि दिनभरको समय खर्चेर जानुपर्ने बाध्यता थियो । सर्वसाधारणको सजिलोका लागि घट्ट बनाइएको वडाध्यक्ष जीवन केसीले बताउनुभयो । नायगाडमा रहेका घट्ट पुग्ने, पिस्ने पालो कुर्ने र फर्कने गरी लामो समय लाग्ने काम अब चाँडै हुने वडाध्यक्ष केसीले बताउनुभयो ।

समुदायले नै सञ्चालन गर्ने गरी घट्ट निर्माण गरिएको छ । घट्ट पिसे वापत प्रति पाथि १० रुपैयाँ लिने र त्यसको रेखदेख तथा व्यवस्थापनका लागि एक जना मान्छे राखिएको छ । दैनिक विहान ११ देखि ३ बजेसम्म मात्रै घट्ट सञ्चालन गर्ने गरिएको छ । यस अवधिमा २ देखि ३ मुरी सम्म अनाज पिस्ने गरिएको छ । गाउँमै बनाइएको घट्टले आफूहरुलाई सजिलो भएको स्थानीयले बताएका छन् । लामो समयदेखि घट्ट पिस्नका लागि मात्रै टाढा जानुपर्ने बाध्यता हटेको भन्दै स्थानीयले खुसी व्यक्त गरेका छन् ।