रुकुम पश्चिमको सदरमुकाम मुसीकोट खलंगामा प्रथम जिल्ला स्तरीय व्यापारीक डबल ब्याडमिन्टन प्रतियोगिता सुरु भएको छ । १३ औं साधारण सभा तथा स्थापना दिवसको अवसरमा रुकुम उद्योग वाणिज्य संघले प्रतियोगिता आयोजना गरेको हो । प्रतियोगिताको रुकुम उद्योग वाणिज्य संघका अध्यक्ष पहलवहादुर खड्का र कोषाध्यक्ष डिलवहादुर केसीले आज विहान उद्घाटन गर्नुभयो । प्रतियोगितामा २० जोडि व्यापारीहरुले सहभागिता जनाएको आयोजकले जनाएको छ ।

खलंगास्थित बालमन्दिरमा चलिरहेको प्रतियोगिता नकआउट सिस्टममा संचालन भइरहेको छ । प्रतियोगिताको विजेता जोडिले २० हजार नगदका साथमा कप, मेडल र प्रमाणपत्र प्राप्त गर्ने छ । उप–विजेता जोडिले नगद १५ हजार र सेमिफाईनलमा पुग्ने २ जोडिले समान ५/५ हजार नगद र कप, मेडल तथा प्रमाणपत्र प्राप्त गर्ने आयोजकले जनाएको छ । त्यस्तै १ जना उत्कृष्ट खेलाडिलाई १ हजार सहित कप, मेडल र प्रमाणपत्रले पुरस्कृत गरिने खेल संयोजक खगेन्द्र रसाईलीले जानकारी दिनुभयो ।

खेलकुदको माध्यमबाट व्यापारीहरुका विचमा भाईचाराको भावना विकास गर्नका लागि प्रतियोगिता आयोजना गरिएको उहाँले बताउनुभयो । प्रतियोगिता फागुन २२ गतेसम्म संचालन उहाँको भनाई छ ।