रुकुम पश्चिममा आयोजित व्यापारीक डबल ब्याडमिन्टन प्रतियोगिताको विजेता दिनेश केसी र भुपेन्द्र केसीको जोडी बनेको । रुकुम उद्योग वाणिज्य संघको १३ औं साधारण सभा तथा स्थापना दिवशको अवसरमा व्यापार, व्यवसायीबीच ब्याडमिन्टन प्रतियोगिता गराइएको थियो । सदरमुकाम खलंगा स्थित बाल मन्दिर प्राङ्गनमा शुक्रबार विहान भएको फाइनल खेलमा नवराज गिरी र चित्र थापाको जोडीलाई २–०, को सोझो सेटमा पराजित गर्दै दिनेश र भुपेन्द्रको जोडी विजेता बनेको हो ।

विजेता बनेको दिनेश र भुपेन्द्रको जोडीले नगद २० हजार प्राप्त गर्दा उपविजेता बनेको नवराज र चित्रको जोडीेले १५ हजार नगद पुरस्कारमा चित्त बुझाएको छ । विहीबार भएको सेमी फाइनलको खेलमा हेमन्त रोका र रामबहादुर विष्टको जोडीलाई पराजित गरी दिनेश र भुपेन्द्रको जोडी फाइलन प्रवेश गरेको थियो । सन्देश रोका र आकाश रोकाको जोडीलाई सेमी फाइनलमा हराएर नवराज र चित्रको जोडी फाइनल प्रवेश गरेको थियो ।

सेमीफाइनल सम्म पुगेको हेमन्त र रामबहादुर तथा सन्देश र आकाशको जोडीलाई ५/५ हजार नगद पुरस्कार प्रदान गरिएको छ । प्रतियोगितामा जिल्ला भित्र व्यापार, व्यवसाय गरिरहेका २० जोडीले सहभागिता जनाएका थिए । कोरोना महामारीपछि व्यापार, व्यवसायीबीचको भेटघाट, जमघट तथा आत्मीयता बढाउन प्रतियोगिता आयोजना गरिएको रुकुम उद्योग वाणिज्य संघका अध्यक्ष पहलबहादुर खड्काले बताउनुभयो । संघले २२ गते साधारण सभा र स्थापना दिवश मनाउँदै छ ।