नेकपा माओवादी केन्द्र रुकुम पश्चिमले चुनावी समिक्षा सुरु गरेको छ । माओवादी केन्द्रले मंसिर ४ मा भएको प्रतिनिधि र प्रदेश सभा निर्वाचन कस्तो भयो, अपेक्षित उपलब्धी हाँसिल भयो वा भएन, सुधार गर्नुपर्ने पाटो लगायतका विषयमा पालिका स्तरमा समिक्षा गरिरहेको छ । बुधबार त्रिवेणी गाउँपालिकाबाट माओवादीले समिक्षा सुरु गरेको हो ।
बुधबार त्रिवेणी गाउँपालिकामा चुनावी समिक्षा गरेको माओवादी केन्द्रले आज जिल्लाको सानीभेरी गाउँपालिकामा चुनावी समिक्षा गरेको छ । प्रतिनिधि र प्रदेश सभा निर्वाचनको समग्र समिक्षा भइरहेको नेकपा माओवादी केन्द्र रुकुम पश्चिमका संयोजक गोविन्द रोकाले जानकारी दिनुभयो ।
अपेक्षित चुनावी नतिजा र प्राप्त चुनावी नतिजा, प्राप्त मत, स्थानीय स्तरसम्म गठबन्धन कति सफल भयो ?, चुनावका क्रममा देखिएका सकारात्मक र नकारात्मक पक्ष, सुधार गर्नुपर्ने पक्ष लगायतका विभिन्न विषयमा स्थानीय पार्टी कमिटीले रिपोर्टिङ गरिरहेको र त्यसमा छलफल चलिरहेको रोकाले बताउनुभयो ।
जिल्लाका सबै पालिकामा चुनावी समिक्षा गर्ने माओवादी केन्द्रले जनाएको छ । समिक्षाका लागि पार्टीका केन्द्रीय सदस्य तथा जिल्ला इन्चार्ज बसन्त शर्मा, केन्द्रीय सदस्य गोपाल शर्मा, कर्णाली प्रदेश अध्यक्ष बिमला केसी, प्रदेश सभा सदस्य महेन्द्र केसी, जिल्ला संयोजक गोविन्द रोका, प्रदेश सदस्य मिलन खड्का लगायतका नेताहरुको टोली खटिएको छ ।
त्यस्तै स्थानीय नेता तथा कार्यकर्ताहरुको पनि समिक्षा कार्यक्रममा सहभागिता रहेको छ । बाम–लोकतान्त्रिक गठबन्धन अनुसार जिल्लाका सबै निर्वाचन क्षेत्रमा माओवादीले भाग पाएकोमा माओवादी उम्मेदवारहरुले फराकिलो अन्तरले विजय हाँसिल गरेका छन् । प्रतिनिधि सभामा जनार्दन शर्मा, प्रदेश सभा १ मा महेन्द्र केसी र २ मा राजकुमार शर्मा निर्वाचित हुनुभएको छ ।
