रुकुम पूर्व पुथाउत्तरगङ्गा गाउँपालिका–१० का एउटै वडाबाट तीन सांसद् बन्नु हुने भएको छ । तीन सांसद नै फरक–फरक पार्टीका समानुपातिक सांसद्को रूपमा छनौट हुनु भएको हो ।
जसमा नेपाली कांग्रेसबाट आदिवासी जनजाति महिला तर्फ प्रतिनिधि सभाको समानुपातिकबाट कुसुमदेवी थापा बुढा मगर, नेकपा माओवादी केन्द्रबाट आदिवासी जनजाति महिला तर्फ लुम्बिनी प्रदेश सभाको समानुपातिकबाट दिलकुमारी बुढा मगर र नेकपा एमालेबाट आदिवासी जनजाति महिला तर्फ लुम्बिनी प्रदेश सभाको समानुपातिकबाट सरिका पुन मगर सांसद् बन्नु भएको छ । यी तीन जना नै पुुथाउत्तरगङ्गा–१० निवासी हुनुहुुन्छ ।
समानुपातिकबाट तीन र प्रत्यक्ष तीन गरी यस पटक जिल्लाले छ सांसद्् पाएको छ । तीन गाउँपालिका रहेको यस जिल्लामा छ सांसद् मध्ये चार जना पुथाउत्तरगङ्गा गाउँपालिकाका हुनुहुन्छ भने एक/एक भूमे र सिस्ने गाउँपालिकाका हुनुहुन्छ । पुथाउत्तरगङ्गा–१० का तीन समानुपातिक सांसद् र प्रदेश सभा प्रत्यक्ष तर्फ सोही गाउँपालिकाको वडा नम्बर १ का सुरुल पुन मगर माओवादी केन्द्रका बागी स्वतन्त्रबाट निर्वाचित हुनु भएको हो ।
प्रत्यक्ष प्रदेश सभा क्षेत्र नम्बर २ बाट वाम–लोकतान्त्रिक गठबन्धनका साझा उम्मेदवार नेपाली कांग्रेसका धनबहादुर केसी (सिस्ने गाउँपालिका–७), प्रत्यक्ष प्रतिनिधि सभाबाट वाम–लोकतान्त्रिक गठबन्धनका साझा उम्मेदवार माओवादी केन्द्रका पूर्णबहादुर घर्ती मगर (भूमे गाउँपालिका–९)का हुनुहुन्छ । २०७४ को निर्वाचनमा जिल्लाबाट तीन प्रत्यक्ष र एक प्रदेश समानुपातिक गरी चार जना सांसद् हुनु भएको थियो ।
