नयाँ बनेको जिल्ला रुकुम पूर्वमा नेपाल पत्रकार महासंघको शाखा स्थापना भएको छ । आज भएको प्रथम भेला तथा अधिवेशनबाट नयाँ नेतृत्व चयन भएसंगै रुकुम पूर्वमा पहिलो पटक नेपाल पत्रकार महासंघको शाखा स्थापना भएको हो । 

रुकुमकोटमा आज भएको पहिलो भेला तथा अधिवेशनले मैत्या घर्तिमगरको अध्यक्षतामा १३ सदस्यीय नेपाल पत्रकार महासंघको जिल्ला कार्यसमिति चयन गरेको छ । जसको उपाध्यक्षमा महेश केसी र सर्जना कार्की, सचिवमा जितेन्द्र बुढाथोकी, सह सचिवमा बिक्रम परियार र मदन बिसी तथा कोषाध्यक्षमा चेतकुमार बिसी चयन हुनुभएको छ । 

त्यस्तै सदस्यहरुमा गोविन्द पुन, प्रभात गुरुङ, जयकुमार श्रेष्ठ, वसम मल्ल र पुजा बुढाथोकी रहनुभएको छ । प्रथम भेला तथा अधिवेशनको आजै जिल्ला समन्वय समिति रुकुम पूर्वका प्रमुख मेघबहादुर श्रेष्ठले गर्नुभएको थियो ।