कर्णाली प्रदेश सभा सदस्य महेन्द्र केसीले पत्रकारलाई गल्ति गर्ने छुट नभएकाे बताउनुभएकाे छ । नेपाल पत्रकार महासंघ रूकुम पश्चिमकाे साताैं साधारण सभालाई मुसिकाेटमा सम्बाेधन गर्दै उहाँले पत्रकारले लेखेकाे र सञ्चार माध्यमले बाहिर ल्याएका विषयलाई हेरेर समाजले धारणा बनाउने भएकाेले पत्रकारले गल्ती गर्ने छुट नभएकाे बताउनुभएकाे हाे ।

साथै उहाँले पत्रकारिताले अब सकारात्मक विषयलाई धेरै जाेड दिनुपर्ने बताउनुभयाे । नकारात्मक कुरालाई मात्र बढी जाेड दिँदा समाजले नै नकारात्मक कुराहरूलाई मात्र बढी चासाे दिने र त्यस्ता कुरालाई मात्र पछ्याउने भएकाेले अब कसरी समाजलाई सकारात्मक कुरामा अघि बढाउने भन्ने चिन्ता थपिएकाे उहाँले बताउनुभयाे ।

अहिले समाजकाे चासाे सकारात्मक पक्षहरूमा पर्न नसकेकाे प्रदेश सभा सदस्य केसीले बताउनुभयाे । हरेक पक्षमा नकारात्मक साेचाईकै कारण समाज सकारात्मक बाटाेमा हिड्न नसकेकाे उहाँकाे भनाई छ । अब पत्रकारिता पनि समाजलाई कसरी सकारात्मक पाटाेमा हिडाउन सकिन्छ भनेर लाग्नुपर्ने बेला भएकाे उहाँले बताउनुभयाे ।