रुकुम पूर्वको भूमे गाउँपालिका जेष्ठ नागरिकलाई सम्मान गरिएको छ ।  दोस्रो राष्ट्रिय जेष्ठ  नागरिक दिवसको अवसरमा गाउँपालिकाले गाउँपालिका भित्र रहेका १८ जना जेष्ठ नागरिकलाई सम्मान गरेको हो । आज एक कार्यक्रमका बिच ९ वटै वडाका जेष्ठ नागरिकलाई सम्मान गरिएको गाउँपालिका अध्यक्ष होमप्रकाश क्षेष्ठले जानकारी दिनुभयो । उहाँका अनुसार पुरुष जेष्ठ नागरिकलाई पटुका र महिला जेष्ठ नागरिकलाई  बर्कोले सम्मान गरिएको छ ।  

गाउँपालिका भित्रका जेष्ठ नागरिक मध्ये बढी उमेरकी ९८ वर्षीया मूली बुढालाई बर्को र नगद सहित गाउँपालिका अध्यक्ष क्षेष्ठ र उपाध्यक्ष  सबिना बुढाले सम्मान गर्नु भएको छ ।  कार्यक्रममा बोल्दै अध्यक्ष श्रेष्ठले जेष्ठ नागरिक एउटा घर परिवारको मात्र नभई राज्यको नै  गहना भएको बताउनुभयाे ।  जेष्ठ नागरिक  ज्ञान र सीपको भण्डार भएको हुदाँ सम्मान कार्यक्रम मात्र नभई अन्य कार्यक्रमहरु पनि गाउँपालिकाले ल्याउने उहाँको भनाई छ ।  

गाउँपालिका अध्यक्ष श्रेष्ठको अध्यक्षतामा भएको कार्यक्रममा  उपाध्यक्ष  बुढा, निमित्त प्रमुख प्रशासकीय अधिकृत उपेन्द्र यादव, ९ वटै वडाका वडा अध्यक्षहरुकाे  उपस्थिति रहेको थियो  । गाउँपालिका  उपाध्यक्ष  बुढाको स्वागत मन्तव्य  कार्यक्रमको सञ्चालन महिला बालबालिका तथा ज्येष्ठ नागरिक शाखाकी कर्मचारी धनिषा पुनले गर्नुभएको थियो ।