रुकुम पश्चिमको मुसिकोट नगरपालिका वडा नम्बर २ मा रहेको दियो साँस्कृतिक युवा क्लव ११ औं वर्षमा प्रवेश गरेको छ । क्लवले आज वार्षिकोत्सवको अवसरमा चियापन, शुभकामना आदान प्रदान तथा सम्मान कार्यक्रम संचालन गरेको छ । 

क्लवलाई यो स्थानसम्म ल्याउन सहयोग गरेको भन्दै क्लवका विशिष्ट आजीवन सदस्य शिवराम खत्री, बालाराम पुन र मनबहादुर खत्रीलाई सम्मान गरिएको क्लवका अध्यक्ष टेकवहादुर खड्काले जानकारी दिनुभयो । त्यस्तै क्लवका सदस्य तथा राष्ट्रिय तेक्वान्दो खेलाडी इला खत्रीलाई पनि क्लवले सम्मान गरेको छ । 

क्लवलाई विभिन्न समयमा १० हजार भन्दा माथिको सहयोग गर्ने मल्ल हार्डववेर मुसिकोट ५, आशा ट्रेडर्स मुसिकोट १ र एसियन होटल मुसिकोट १ लाई समेत क्वलको वार्षिकोत्सवको अवसरमा सम्मान गरिएको अध्यक्ष खड्काले बताउनुभयो । २०६९ माघ ४ गते स्थापना भएको क्लवले विभिन्न सामाजिक काम गर्दै आएको छ । 

क्लव जिल्लामा हुने मेला पर्वमा साँस्कृतिक कार्यक्रम लिएर जाने गरेकाे छ । क्लवले एम्बुलेन्स समेत संचालन गरिरहेको छ । त्यस्तै विभिन्न विपन्न र दुःखमा परेका व्यक्तिहरुलाई क्लवले सहयोग गरिरहेको छ भने क्लवको आफ्नै भवन रहेको छ । क्लवका अध्यक्ष टेकबहादुर खड्काको अध्यक्षतामा दिवस विशेष कार्यक्रम भएको थियो । 

कार्यक्रममा मुसिकोट नगरपालिकाका प्रमुख महेन्द्र केसीको प्रमुख, वडाध्यक्ष दिनेश खड्काको विशेष र पूर्व वडाध्यक्ष काशिराम खड्का, मुसिकोट नगरपालिकाका लेखा अधिकृत नरेन्द्र बिष्ट लगायतको आतिथ्यता रहेको थियो । कार्यक्रमको संचालन क्लवका सचिव सुरेश खत्रीले गर्नुभएको थियो ।