रुकुम पश्चिमको सानीभेरी गाउँपालिकामा जनयुद्ध दिवसको अवसरमा हरेक वर्षको फागुन १ गते आयोजना हुँदै आएको मौराखारा गुरिल्ला म्याराथनको पुरस्कार यो वर्ष बढाइएको छ । गाउँपालिकाले यो वर्ष म्याराथनको पुरस्कार बढाएको हो । 

४६ किलोमिटर दुरि रहेको पुरुष म्याराथनको विजेताले नगद १ लाख पुरस्कार पाउने आयोजक सानीभेरी गाउँपालिकाले जनाएको छ । द्धितियले ७५ हजार पुरस्कार पाउँदा तृतियले ४५ हजार र चौंथो हुनेले १५ हजार पुरस्कार पाउने छन् । प्रतियोगिताको दशौं स्थानसम्म हाँसिल गर्ने प्रतियोगीले जनही ३ हजार पुरस्कार पाउने गाउँपालिकाको भनाई छ । 

त्यस्तै २१ किलोमिटर दुरिमा संचालन हुने महिला गुरिल्ला म्याराथनको विजेता पुरस्कार नगद ६० हजार तोकिएको छ । दोस्रो हुनेले ४० हजार, तेस्रो हुनेले २० हजार, चौथो हुनेले १० हजार र दशौं स्थान सम्मकालाई जनही ३ हजार दिने गाउँपालिकाको भनाई छ । 

गत संस्करणमा पुरुष तर्फ प्रथम पुरस्कार ८० हजार, द्धितिय पुरस्कार ५५ हजार, तृतिय पुरस्कार ३५ हजार र शान्त्वना पुरस्कार १० हजार थियो भने महिला तर्फ प्रथम पुरस्कार ५५ हजार, द्धितिय पुरस्कार ४० हजार, तृतिय पुरस्कार २० हजार र शान्त्वना पुरस्कार १० हजार थियो ।  

प्रतियोगितालाई राष्ट्रव्यापी बनाउन र यसको महत्वलाई बढाउनका लागि थप व्यवस्थित बनाउदै लैजाने क्रममा यो वर्षेनी पुरस्कार प्रतियोगिताको पुरस्कार राशि बढ्दो क्रममा रहेको गाउँपालिका अध्यक्ष विर्खवहादुर विष्टले जानकारी दिनुभयो । गाउँकार्यपालिकाले प्रतियोगिताको तयारीका लागि कार्यपालिका प्रवक्ता पहलसिंह घर्तीलाई जिम्मा दिएको छ । 

सानीभेरी गाउँपालिकाले जनयुद्ध दिवसका अवसरमा तत्कालिन माओवादी गुरिल्लाहरुले प्रयोग गरेको बाटोलाई नक्सांकन गरेर त्यसमा म्याराथन संचालन गर्दै आएको छ । गाउँपालिकाको प्रशासनीक केन्द्र सिम्ली देखि जनयुद्धका समयमा माओवादी सेना उत्पादन भएको ठाउँ मौराखारा लेकसम्म पुग्ने गरी म्याराथनको रुट तय गरिएको छ । 

उक्त रुटमा धावकहरुलाई दौडाइन्छ । यो प्रतियोगिताको पाँचौ संस्करण हो । गत वर्ष भने कोभिड–१९ का कारण प्रतियोगिता हुन सकेको थिएन् । यस संस्करणको आयोजक गाउँपालिका रहेको छ भने सह आयोजक युवा, खेलकुद विकास समिति सानीभेरी रहेको छ ।