रुकुम पश्चिममा भर्खरै सरुवा भएर आउनुभएका प्रमुख जिल्ला अधिकारी हरिप्रसाद पन्तले जिल्लास्थित पत्रकारहरुसंग छलफल तथा अन्तरक्रिया गर्नुभएको छ । जिल्लामा नयाँ आउनुभएका प्रमुख जिल्ला अधिकारी पन्तले आज आफ्नै कार्यकक्षमा जिल्लास्थित क्रियाशिल पत्रकारहरुसंग भेट, छलफल तथा अन्तरक्रिया गर्नुभएको हो । 

भेटमा जिल्लास्थित पत्रकारहरुले प्रमुख जिल्ला अधिकारीलाई स्वागत गर्दै जिल्लाको समग्र वस्तुस्थितिका बारेमा जानकारी गराएका थिए । साथै पत्रकारहरुले प्रशासनका तर्फबाट यसअघि सुरुवात भएका राम्रा कामको निरन्तरताका लागि आग्रह गरेका थिए भने जिल्लामा अलपत्र अवस्थामा रहेका योजनाहरुको पूर्णताका लागि ध्यान दिन प्रमुख जिल्ला अधिकारीलाई आग्रह गरेका थिए । 

विकास निर्माणको पूर्णता संगै सुशासनको पाटोमा पनि चनाखो रहन पत्रकारहरुले सुझाव दिएका थिए । जवाफमा प्रमुख जिल्ला अधिकारी पन्तले जिल्लामा रहँदासम्म जिल्लाको समग्र हितका लागि काम गर्ने प्रतिबद्धता व्यक्त गर्नुभयो । भेटका क्रममा पत्रकारहरुले दिएका सुझाव र उठाएका महत्वपूर्ण कुराहरुलाई आफुले नोट गरेको भन्दै उहाँले यसतर्फ गम्भिर भएर लाग्ने बताउनुभयो । 

साथै उहाँले कुनै एक पक्षले मात्र चाहेर केही नहुने भन्दै जिल्लाको समग्र विकासका लागि सबै पक्ष र क्षेत्रले हातोमालो गर्न आवश्यक रहेकोमा जोड दिनुभयो । यसका लागि आफुले पहल गर्ने साथै यसअघिबाट संचालनमा रहेका राम्रा अभ्यासको निरन्तरताका लागि पनि आफुले सक्दो भूमिका खेल्ने उहाँले बताउनुभयो । 

यसअघि जिल्ला प्रशासन कर्याालय ललितपुरमा सहायक प्रमुख जिल्ला अधिकारीका रुपमा कार्यरत पन्त सोमबार देखि रुकुम पश्चिमको प्रमुख जिल्ला अधिकारीका रुपमा हाँजिर हुनुभएको हो । जिल्लाका यस अघिका प्रमुख जिल्ला अधिकारी परमानन्द घिमिरे भने रोल्पाको प्रमुख जिल्ला अधिकारी भएर जानुभएको छ ।