माटोको ढिस्को खस्दा एक महिलाको मृत्यु भएको छ । जिल्लाको आठबीसकोट नगरपालिका ९, औलधारामा माटो खन्ने क्रममा माथिबाट खसेको ढिस्कोले पुरिएर सोही ठाउँकी ३५ वर्षीया शुशिला नेपालीको मृत्यु भएको हो । शनिबार विहान शुशिला सहित ४ जना महिला घर लिप्ने माटो खन्नका लागि गएका थिए । माटोको ढिस्कोले लागेर अरु ३ महिला घाइते भएका छन् । सोही ठाउँका २९ वर्षीया निर्मला चँदारा, १५ वर्षकी प्रतिमा विक र ४५ वर्षकी गीता बटाला घाइते भएको जिल्ला प्रहरी कार्यालयका सूचना अधिकारी प्रहरी निरीक्षक हरि ओलीले जानकारी दिनुभयो । उहाँका अनुसार घाइते ३ जनाकै राडी स्थित नगर अस्पतालमा उपचार भइरहेको छ । यस अघि माटो खनिएको खाडलभित्र गएर माटो खन्ने क्रममा माटोको ढिस्को खसेको थियो ।