नेपाल कम्युनिस्ट पार्टी (नेकपा) बहुमत रुकुम पश्चिमले जिल्ला प्रशासन कार्यालयमा गिरफ्तार नेता तथा कार्यकर्ताको रिहाइको माग गर्दै ज्ञापन पत्र बुझाएको छ । आइतबार नेकपा बहुमतले जिल्ला प्रशासन कार्यालयमा पुगेर प्रमुख जिल्ला अधिकारी हरिप्रसाद पन्तलाई  सरकारसँग भएको तीन बुँदे सहमति कार्यान्यवन गर्न, गिरफ्तार नेता तथा कार्यकर्ताको रिहाइको माग गर्दै ज्ञापन पत्र बुझाएको हो । 

नेकपा बहुमतको केन्द्रिय कार्यक्रम अनुसार जिल्ला प्रशासन कार्यालयमा ज्ञापन पत्र बुझाएको पार्टीका ९ औँ महाधिवेशन आयोजक समितिका सदस्य तथा केन्द्रिय सदस्य हिरामणि रावलले जानकारी दिनुभयो ।  उहाँका अनुसार तीनबुँदे सहमति विपरित झुट्टा मुद्दा लगाइ अन्यायपूर्ण तरिकाले देशका विभिन्न जेलमा बन्दी बनाएका सम्पूर्ण बन्दीलाई रिहाइको माग गरिएको छ । देशका विभिन्न कारागारमा रहेका बन्दीहरूको नामवली समेत बुझाएको केन्द्रिय सदस्य रावलले जानकारी दिनुभयो । 

केन्द्रिय सदस्य रावल, युवा जन स्वंयमसेवक संगठनका केन्द्रिय सदस्य शिव रसाईली, अखिल क्रान्तिकारीका केन्द्रिय सदस्य सोमपाल कामी लगायत अखिल क्रान्तिकारीका जिल्ला सदस्यहरूको उपस्थितिमा ज्ञापन पत्र बुझाएको हो ।