रुकुम पश्चिमको मुसीकोट नगरपालिका ९, का नागरिकले घरआँगनमै सरकारी सेवा प्राप्त गरेका छन् । यो वडाका नागरिकलाई सहजता प्रदान गर्न वडाका सम्पूर्ण सेवा घर आँगनमै लिइएको हो । एकीकृत घुम्ती सेवा अभियान मार्फत वडाध्यक्ष, सचिव, वडामा रहेका कृषि, पशु तथा स्वास्थ्य संस्थाका प्रमुख तथा प्रतिनिधिहरु आ-आफ्नो सेवा सहित घर आँगमै पुगेका हुन् ।

यही फागुन २४ देखि २८ सम्म ५ दिन सम्म वडा कार्यालयको सेवा वडाका विभिन्न टोलमा पुर्याइएको थियो । घुम्ती सेवा अभियानका क्रममा २ सय ५२ जनाले मालपोत तथा सम्पती कर घर आँगन तथा घर नजिकै बुझाएका छन् । यसबाट एक लाख २९ हजार आठ सय ५५ रुपैयाँ राजश्व संकलन भएको छ । १ सय ३४ जना विरामीको निःशुल्क चेकजाँच तथा उपचार भएको छ भने औषधी पनि निःशुल्क नै प्रदान गरिएको छ ।

स्वास्थ्य सेवा लिनेमा ८४ जना महिला र ५० जना पुरुष रहेको वडा कार्यालयले जनाएको छ । १० जनाले विभिन्न व्यक्तिगत कागजात प्रमाणित गराएका छन् भने २ जनाको जन्मदर्ता, १ वटा विवाह दर्ता २ जना बालबालिकाको पोषण भत्ताको निवेदन संकलन भएको छ । २ सय ३९ जना कृषकका २ हजार ३ सय २० वटा पशुचौपायको स्वास्थ्य चेकजाँच तथा निःशुल्क उपचार र औषधी वितरण गरिएको छ । १० वटा बोकाको बन्ध्याकरण सेवा पनि अभियानको क्रममा दिइएको छ ।

वडा कार्यालय प्रवाह गर्ने सेवा, सिफारिसका बारेमा पनि अभियानको क्रममा जानकारी गराइएको छ । घुम्ती सेवा अभियान सफल भएको वडाध्यक्ष नविन ओलीले बताउनुभयो । बेला बेला यस्तै शिविर गर्दै आएको वडाले यस पटक पनि अभियान सञ्चालन गरेको हो । कोरोनाका कारण अभियान सञ्चालन गर्न नपाइएकाले यस पटक ५ दिनको अभियान सञ्चालन गरिएको वडाध्यक्ष ओलीले बताउनुभयो । अभियानका क्रममा सबै जनताको घर आँगनसम्म पुगिने हुनाले यसबाट जनताले नजिकै सेवा पाउने तथा जनताको समस्या नजिकैबाट बुझिने ओलीको भनाई छ ।

यस्ता अभियानलाई आगामी दिनमा पनि थप व्यवस्थित र सुविधा सहित वडामा लैजाने योजना रहेको वडाध्यक्षले ओलीले जानकारी दिनुभयो । अभियानमा वडाध्यक्ष ओली, वडा सचिव टेकबहादुर रोकाय, सम्बन्धित टोलका वडा सदस्य, स्वास्थ्य सहायक डेविट रावल, पशु प्राविधिक शिवराज महतरा, अनिता ओली लगायतको जनशक्ति परिचालन भएको थियो ।