राष्ट्रिय परिचयपत्रका लागि अब जिल्ला प्रशासन कार्यालय धाइरहनु नपर्ने भएको छ । नागरिकताको विकल्पमा वितरण गर्न लागिएको राष्ट्रिय परिचयपत्रका लागि जिल्लाको ३१ वटै वडा कार्यालयबाट विवरण सङ्कलन गरिने भएको हो । जसमा जिल्लाको भूमे गाउँपालिकामा यही फागुन ५ गते देखि राष्ट्रिय परिचयपत्रका लागि विवरण दर्ता कार्य सुरु गरिएको छ । 

नागरिकता प्राप्त गरेका नागरिकको राष्ट्रिय परिचयपत्रका लागि विवरण दर्ता कार्य भूमे गाउँपालिकाबाट सुरु गरिएको प्रमुख जिल्ला अधिकारी तुलाराज सुनुवारले जानकारी दिनुभयो । तीन गाउँपालिका रहेको यस जिल्लामा बाँकी दुई गाउँपालिका पुथाउत्तरगङ्गा र सिस्नेका वडाबाट पनि छिट्टै दर्ता कार्य सुरु गरिने प्रमुख जिल्ला अधिकारी सुनुवारको भनाइ रहेको छ । जिल्ला प्रशासन कार्यालयको पहलमा राष्ट्रिय परिचयपत्र तथा पञ्जीकरण विभाग र स्थानीय सरकारको समन्वयमा जिल्लाका प्रत्येक वडाबाटै राष्ट्रिय परिचयपत्रको विवरण दर्ता कार्य सुरु गरिएको सुनुवारको भनाइ रहेको छ । 

राहदानी बनाउनेका लागि राष्ट्रिय परिचयपत्र अनिवार्य गरेपछि यसअघि जिल्ला प्रशासन कार्यालयमा विवरण टिपाउन सेवाग्राही लाइनबद्ध हुनुपर्ने बाध्यता थियो । राहदानी बनाउने र नयाँ नागरिकता लिनेहरूले यसअघि विवरण टिपाउनकै लागि सास्ती भोग्दै आएका थिए । जिल्ला प्रशासन कार्यालयमा सेवाग्राहीले सास्ती खेप्दै आएपछि रहेक वडाबाटै विवरण दर्ताको कार्य सञ्चालन गरिएको प्रजिअ सुनुवारले बताउनुभयो । 

हरेक वडामा दुई जना अपरेटर, रुजु गर्ने अधिकारी र एक जना दर्ता सहयोगी विवरण संकलनका लागि कर्मचारी खटिएको भूमे गाउँपालिकाका प्रमुख प्रशासकीय अधिकृत चन्द्रसिंह श्रेष्ठले जानकारी दिनुभयो । नागरिकता प्राप्त गरेका नागरिकले राष्ट्रिय परिचयपत्र विवरण दर्ताका लागि आवश्यक कागजात सहित वडा कार्यालय जान गाउँपालिकाले नागरिकलाई आग्रह गरेको छ । नागरिकता प्राप्त गरेका नागरिकको विवरण दर्ता कार्य नसकिदा सम्म वडामा राष्ट्रिय परिचयपत्र विवरण दर्ता कार्य जारी रहने गाउँपालिका प्रमुख प्रशासकीय अधिकृत श्रेष्ठले बताउनुभयो ।