नेकपा एमालेका सचिव योगेश भट्टराइले नेकपा एमाले अहिलेको सत्ता समीकरण ५ वर्षसम्म टिकोस भन्ने पक्षमा रहेको बताउनुभएको छ । प्रेस चौतारी नेपाल रुकुम पश्चिमले जिल्ला सदरमुकाम मुसिकोटमा आज बिहान आयोजना गरेको पत्रकार सम्मेलनमा बोल्दै उनले नेकपा एमाले पुष १० बाट बनेको सत्ता समीकरण ५ वर्षसम्म चलोस र देशले स्थायीत्व पाओस भन्ने पक्षमा रहेको बताउनुभएको हो  । 

छिटो छिटो सत्ता समीकरण फेरिँदा अन्तराष्ट्रिय रुपमा देशको छवि समेत राम्रो नहुने भएकोले कम्तिमा ५ वर्षसम्म यो समीकरण चलोस भन्नेमा एमाले दृढ रहेको र यसका लागि अधिकतम प्रयास गरिरहेको उहाँले स्पस्ट पार्नुभयो । यसैविच उहाँले गत पुष १० को सहमति कार्यान्वयन हुनुपर्नेमा जोड दिनुभएको छ । उक्त सहमति अनुसार नभए एमाले सरकारमा नबस्ने उहाँले बताउनुभयो । 

सहमति पालना हुन्छ भन्नेमा एमाले विश्वस्त रहेको र यदी नहुने अवस्था भयो भने सरकारमा नबस्ने बताउनुभएको हो । पुष १० मा एमालेले राष्ट्रपति पाउने सहमति भएको उहाँले दाबी गर्नुभयो । सोही सहमति अनुसार सत्ता समीकरण भित्रबाट राष्ट्रपतिमा एमालेको साझा उम्मेदवार हुनुपर्ने उहाँको भनाई छ । 

‘तत्कालिन गठबन्धन भत्किएर नयाँ समिकरण बन्दा पुष १० मा माओवादीले प्रधानमन्त्री र एमालेले राष्ट्रपति, सभामुख पाउने सहमति भएको हो, उहाँले भन्नुभयो सभामुख, उपसभामुखसम्म आइपुग्दा उक्त सहमति कार्यान्वयन भएको छ, अहिलेपनि सहमति अनुसार नै सत्ता समीकरण चलिरहेको छ, एमालेलाई विश्वास छ त्यो सहमति राष्ट्रपतिको चुनावसम्म पनि कायम हुन्छ ।’

यदी सहमति विपरित हुने अवस्था आएमा एमाले सरकारमा नरहने उहाँले स्पस्ट पार्नुभयो । ‘एमालेले दुई वटा डुंगामा खुट्टा हाल्दैन, १० गतेको सहमति कार्यान्वन भयो भने हामी सरकारमा रहन्छौं, १० गतेको सहमति कार्यान्वयन भएन भने हामी कसरी सरकारमा रहन्छौं ?’ उनले उल्टै प्रश्न गरे ।

साथै उहाँले एमालेपनि राष्ट्रिय सहमतिको पक्षमा रहेको बताउनुभएको छ । एमालेको उम्मेदवारमा राष्ट्रिय सहमति हुनुपर्ने बताउँदै उहाँले त्यसो नभए कांग्रेसले छुट्टै आफ्नो उम्मेदवार उठाउन सक्ने तर सत्ता गठबन्धनबाट एमालेको उम्मेदवार हुनुपर्ने उहाँको भनाई छ ।