कृषिमा क्रान्ति गर्नु पर्ने रुकुमपूर्वका सङ्घीय सांसद् पूर्णबहादुर घर्ती मगरले बताउनु भएको छ । शनिबार जिल्लाको भूमे गाउँपालिकामा आयोजना गरिएको पालिका स्तरीय कृषि मेला कार्यक्रमलाई सम्बोधन गर्दै सांसद् घर्ती मगरले अबको यात्रा कृषि क्रान्ति गर्नु पर्ने बताउनु भएको हो ।
“क्रान्ति भन्ने वित्तिकै मान्छेमा तरास हुने अथवा जत्त सुन्दा सबैलाई मन नपर्ने हुन सक्छ” घर्ती मगरले भन्नुभयो –“तर, आजको सुरुवाति क्रान्ति नै भोलिको नयाँ परिवर्तन ल्याउनु हो ।” परम्परागत कठिनाई नीतिलाई विस्थापित गर्दै सहजताको लागि नयाँ नीति, नियम ल्याउन तथा राम्रो अभ्यास गर्नु नै क्रान्ति रहेको घर्ती मगरले बताउनुभयो । त्यस कारण हिजो व्यवस्था परिवर्तन ल्याउनका लागि ठुलठुलो क्रान्ति भए अब व्यवस्थालाई कार्यन्वय गर्दै अवस्था परिवर्तन गर्ने मेरुदण्डको रुपमा कृषि क्रान्ति रहेको उहाँको भनाइ छ ।
कृषि योग्य भूमि र विगत देखि कृषिमा आत्मनिर्भर हुँदै आएका हामी हाम्रो जनजीवनको स्तर माथि उकास्ने मुख्य मन्त्र कृषि क्रान्ति रहेको घर्ती मगरले बताउनुभयो । कृषि क्रान्तिका लागि राज्यले आधुनिकरण तर्फ अघि बढिरहेको बताउनुभयो । राज्यले कृषिमा लगानी गरेको अनुदान तथा सहयोग कृषकले पनि सही ढंगले सदुपयोग गर्दै पछि सम्म प्रतिफल दिने खालको इमान्दार रुपमा बजेटको सदुपयोग गर्नु पर्नेमा समेत उहाँले जोड दिनुभयो । लोपउन्मुख कृषि उपजलाई बढवा दिँदै बजारले माग गरे अनुसारको कृषि उत्पादनमा लाग्नु पर्ने उहाँले बताउनुभयो ।
भूमे गाउँपालिका स्तरीय बृहत् कृषि मेला प्रदर्शनी कार्यक्रम शनिबार भूमे–२ स्थित मारिङ बहुउद्देश्यीय सहकारीको प्राङ्गण खाबाङ बगरमा गरिएको हो । कृषि मेला प्रदर्शनी कार्यक्रममा कृषकले विभिन्न प्रकारका कृषि उपज ल्याएका थिए । त्यस मध्येबाट उत्कृष्ट कृषि उपज धनीलाई नगद सहित कदर प्रमाण पत्रले पुरस्कृत समेत गरिएको आयोजकले जनाएको छ । भूमे गाउँपालिका, रुकुमेली समाज विकास केन्द्र रुकुम र विकास सरोकार समाजको आयोजनामा कृषि मेला प्रदर्शनी कार्यक्रम गरिएको थियो ।
भूमे गाउँपालिकाका अध्यक्ष होमप्रकाश श्रेष्ठको अध्यक्षतामा उद्घाटन कार्यक्रम गरिएको हो । प्रमुख अतिथिमा सङ्घीय सांसद् पूर्णबहादुर घर्ती मगर, विशेष अतिथिमा लुम्बिनी प्रदेशसभाका सांसद् सुरुल पुन मगर, जिल्ला समन्वय समितिका प्रमुख मेघबहादुर श्रेष्ठको रहेको थियो ।
अन्य अतिथिमा पुथाउत्तरगंगा गाउँपालिकाका अध्यक्ष पुनिराज घर्ती मगर, भूमे गाउँपालिकाका उपाध्यक्ष सविना बुढा, भूमे गाउँपालिकाका निवर्तमान अध्यक्ष रामसुर बुढा मगर, गाउँपालिकाका प्रमुख प्रशासकीय अधिकृत चन्द्रसिंह श्रेष्ठ, एकीकृत कृषि तथा पशुपंक्षी विकास कार्यालयका प्रमुख पिताम्बर बस्नेत, रुकुमेली समाज विकास केन्द्रका अध्यक्ष नरबहादुर नेपाली, पालिका स्थित विभिन्न वडाका वडाध्यक्षहरूको आतिथ्यता रहेकोमा कार्यक्रम सञ्चालन रुकुमेली समाज विकास केन्द्रका फिल्ड सुपरभाइजर रञ्जना विकले गर्नु भएको थियो ।
कार्यक्रमका केही फोटोहरुः
