रुकुम पश्चिमको बाँफिकोट गाउँपालिका वडा नम्बर २ मा सरसफाई गरिएको  छ । वडा कार्यालय र महिला सहज सञ्जालको आयोजना तथा महिला पुनस्र्थापना केन्द्र ओरेक नेपालको सहकार्यमा सरसफाई गरिएको हो । 

वडाको छिपछिपी देखि पाखापानीसम्म रहेका सार्वजनिक स्थल, मुख्य व्यापारीक केन्द्र र टोल सरसफाई गरिएको ओरेक नेपालकी मनोविमर्शकर्ता धनीकुमारी गिरीले जानकारी दिनुभयो । सार्वजनिक ठाउँमा जम्मा भएको फोहोर हटाउन र वातावरण सफा राख्नको लागि सरसफाइ गरिएको उहाँको भनाई छ । 

जम्मा भएको फोहोरलाई जलाएर नष्ट गरिएको छ । अब देखि महिला समुहले हरेक शनिबार टोल सरसफाई गर्ने भएका छन् । वडाले फोहोर राख्नको लागि डस्टबिनको व्यवस्था गरिदिने वडा अध्यक्ष प्रकाश खत्रीले बताउनुभयो । सरसफाई कार्यक्रममा वडाका जनप्रतिनिधि, स्वास्थ्यकर्मी, महिला समूह, व्यापारी तथा स्थानीयको सहभागिता रहेको थियो ।