जिल्ला प्रहरी कार्यालय रुकुम पश्चिमले मुसिकोट नगरपालिका ८ को एक जंगलबाट ४ थान भरुवा बन्दुक बरामद गरेको छ । घोरखानी किटिनीको जंगलबाट बेवारिसे अवस्थामा रहेका ४ थान भरुवा बन्दुक बरामद गरिएको जिल्ला प्रहरी कार्यालयले जनाएको छ । 

आइतबार राती जंगलमा वेवारिसे अवस्थामा रहेका ४ नाल भरुवा खाली बन्दुक फेला परेको जिल्ला प्रहरी कार्यालयका सूचना अधिकारी प्रहरी निरीक्षक राजिव श्रेष्ठले जानकारी दिनुभयो । गोप्य सूचनाका आधारमा खोजी गर्दा सोत्तरले छोपेर ओढारमा लुकाएको अवस्थामा बन्दुक फेला परेको उहाँको भनाई छ । 

स्थानीयले शिकारका लागि उक्त बन्दुक लुकाएर राखेको हुनसक्ने अनुमान गरिएको प्रहरी निरीक्षक श्रेष्ठले बताउनुभयो । जंगलमा भेटिएका बन्दुक बरामद गरी घटनाको अनुसन्धान गरिरहेको उहाँले बताउनुभयो ।