रुकुम पश्चिम बाँफिकोट गाउँपालिकाका ५० जना जनप्रतिनिधिले सभागृह बनाउन आर्थिक सहयोग गर्ने भएका छन् । बाँफिकोट गाउँकार्यपालिका र गाउँ सभाका सदस्यहरुले सहिद परिवार समाज नेपालको सभा गृह बनाउन एक महिनाको पारीश्रमिक सहयोग गर्ने निर्णय गरेका छन् । कार्यपालिका हुँदै गाउँसभाबाट उक्त निर्णय पारीत भएको छ । गाउँ कार्यपालिका र गाउँसभामा गरी ५० जना प्रतिनिधि नेकपा माओवादी केन्द्रका मात्रै छन् ।
अध्यक्ष, उपाध्यक्ष, वडाध्यक्ष, कार्यपालिका सदस्य र गाउँ सभाका सदस्य गरी ५० जनाले एक महिनाको पारीश्रमिक सहिद परिवार समाज नेपाल बाँफिकोट गाउँपालिकाले बनाउन लागेको सभा गृहको लागि जग्गा किन्ने प्रयोजनमा सहयोग गर्ने निर्णय भएको गाउँपालिका अध्यक्ष धर्मबहादुर केसीले जानकारी दिनुभयो । ५४ जनाको गाउँसभामा एक जना जिल्ला समन्वय समितिमा निर्वाचित हुनुभएको छ भने २ जना सदस्यको मृत्यु भएको छ । एक जना सदस्य अर्कै पार्टीको भएकाले माओवादी केन्द्रका सबै जनप्रतिनिधिले आर्थिक सहयोग गर्ने निर्णय भएको अध्यक्ष केसीले बताउनुभयो ।
कर्णाली प्रदेश सभाले पारीत गरेको जनप्रतिनिधिको सेवा सुविधा ऐन अनुसार गाउँपालिका अध्यक्षले महिनामा ३३, उपाध्यक्षले २७, वडाध्यक्षले १९, कार्यपालिका सदस्यले साढे दश हजार, र वडा सदस्यले साढे ५ हजार सेवा सुविधा वापत पाउँछन् । यसमध्यको १० प्रतिशत रकम जनप्रतिनिधिले पार्टीलाई विशेष लेबीका रुपमा बचाउँछन् ।बाँकी ९० प्रतिशत रकम भने सहिद परिवार समाजलाई दिनेछन् ।
सभागृह निर्माणका लागि ७० लाख बजेट प्राप्त भएको छ । उक्त बजेटबाट सभागृह निर्माण हुने भएकाले जग्गा खरिदका लागि आवश्यक बजेट जुटाउन उक्त समाज लागि परेको छ । बजेट जग्गा खरिदका लागि १० देखि १२ लाख लाग्ने अनुमान गरिएको समाजका अध्यक्ष धनबहादुर खत्रीले बताउनुभयो । त्यसका लागि आवश्यक सहयोगका लागि सरोकारवालासित आग्रह गरिएको अध्यक्ष खत्रीले बताउनुभयो ।
विशेष गरी गाउँपालिका भित्रका कर्मचारी, शिक्षक, व्यापारी, अरु जनप्रतिनिधि, बाँफिकोटसँग चासो राख्ने तर बाहिर बस्नेलाई सहयोगका लागि आग्रह गर्ने तयारी छ । यसैगरी देश विदेशमा रहनुभएको महानुभावसँग पनि सहयोग आग्रह गरिने सहिद परिवार समाजको बाँफिकोट गाउँपालिका उपाध्यक्ष टिकाराम खत्रीले बताउनुभयो ।
