एउटै औंलामा लामो समय किताब घुमाउने रेकर्ड रुकुम पश्चिमका युवाले कायम गरेका छन् । रुकुम पश्चिमको आठबीसकोट नगरपालिका ११, चौरका २० वर्षीय मानसिंह ओली 'प्रभास'ले १ किलो २ सय ग्राम तौलको किताब सबैभन्दा लामो समय हातको एउटा औंलामा घुमाएर विश्व रेकर्ड कायम कायम गर्नु भएको हो ।

काठमाडौंको एक कलेजमा डिप्लोमा इन जिओम्याट्रिक तेस्रो वर्षमा अध्ययनरत उहाँले ‘Longest time spinning a Guinness World Records book on one finger’को टाइटल जित्नु भएको हो । यस अघि उक्त टाइटल नेपालकै गौरवराज घिमिरेको नाममा थियो । घिमिरेले २०१९ मा उक्त रेकर्ड राखेका थिए । यस अघिको रेकर्ड तोड्दै ओलीले नयाँ रेकर्ड बनाउनु भएको हो । ओलीले उक्त किताब ३ घण्टा ४० मिनेट ४ सेकेण्ड घुमाउनुभयो । अघिल्लो रेकर्डमा यो समय २ घण्टा १० मिनेट ४ सेकेण्ड मात्रैको थियो ।