रुकुम पश्चिममा फागुन २२ गते देखि चैत १ गतेसम्म मतदाता नामावली अद्यावधिक कार्यक्रम सञ्चालन हुने भएको छ । चितवन क्षेत्र नम्बर २ मा बैशाख १० गते उप निर्वाचन हुने भएकाले त्यसलाई लक्षित गर्दै रुकुम पश्चिममा पनि मतदाता नामावली अद्यावधिक कार्यत्रम सञ्चालन हुन लागेको हो । 

निर्वाचन आयोगबाट मतदाता नामावली अद्यावधिक गर्न जिल्ला निर्वाचन कार्यालयलाई पत्राचार भए अनुसार जिल्लामा फागुन २२ गते देखि चैत १ गतेसम्म मतदाता नामावली अद्यावधिक कार्यक्रम सञ्चालन गर्न लागिएको जिल्ला निर्वाचन अधिकारी कुमारी रिमा मल्लले बताउनुभयो ।

जिल्ला प्रशासन कार्यालयमा आज आयोजना गरिएको अन्तरक्रिया कार्यक्रममा उहाँले मतदाता नामावाली अद्यावधिक तथा दाबी विरोध कार्यक्रमलाई सफल बनाउन स्थानीय तहहरुले पनि आफ्नो ठाउँबाट सहयोग गर्नुपर्ने बताउनुभयो । निर्वाचन कार्यालयले फागुन २२ गतेदेखि सम्बन्धीत वडा कार्यालयमा मतदाता नामावली प्रकाशन गर्ने कार्यक्रम रहेको जनाएको छ ।
 
त्यसपछि नामावलीमा रहेको त्रुटि सच्याउन, मतदाता नामावलीमा मृत्यु भएका, नागरिकता त्याग गरेका वा नागरिकता रद्ध भएका मतदाताको नामावली हटाउने, झुट्टा विवरण दिई नामावलीमा नाम समावेश भएको भए उजुरी दिने, दुई वा दुई भन्दा बढी मतदान स्थलमा नाम भएको भए आफुलाई नजिक पर्ने मतदान स्थलमा नाम सार्न लागि सम्बधित पालिकाका वडा कार्यालय मार्फत निवेदन दिन फागुन २२ गते देखि २८ गतेसम्मको समय तोकिएको छ ।

मतदाता नामावली अद्यावधिक गरेको नयाँ विवरण चैत १ गतेसम्म निर्वाचन आयोगमा पठाई सक्नुपर्ने कार्यक्रम रहेको जिल्ला निर्वाचन अधिकारी मल्लले बताउनुभयो । 

उप निर्वाचन चितवन क्षेत्र नम्बर २ मा हुने भएपनि नेपाली नागरिक र मतदाता नामावलीमा नाम भएका र योग्यता पुगेका व्यक्तिले उम्मेदवारी दिन पाउने भएकाले निर्वाचन आयोगले देशभरमा मतदाता नामावली अद्यावधिक गर्न पत्राचार गरेको जिल्ला निर्वाचन समितिका संयोजक तथा प्रमुख जिल्ला अधिकारी हरिप्रसाद पन्तले बताउनुभयो । 

मतदाता नामावली अद्यावधिकले जिल्लामा पनि मतदाता नामावली शुद्धतामा सहयोग पुग्ने पन्तले बताउनुभयाे । प्रमुख जिल्ला अधिकारी पन्तको अध्यक्षतामा भएको अन्तरक्रिया कार्यक्रमा जिल्ला समन्वय समिति प्रमुख लुम्बिनी गौतमको प्रमुख आतिथ्यता रहेको थियो ।

त्यस्तै मुसीकोट नगरपालिकाका उप–प्रमुख विमलकुमार पुन, सानीभेरी गाउँपालिका अध्यक्ष बिर्खबहादुर विष्ट, त्रिवेणी गाउँपालिका अध्यक्ष गणेशकुमार केसी, जिल्ला समन्वय समितिका उप–प्रमुख देवबहादुर विक, प्रमख सेनानी प्रमोदकुमार शर्मा, प्रहरी नायव उपरीक्षक नमराज भट्राई, शसस्त्र प्रहरी नायव उपरीक्षक गोविन्दबहादुर केसी, अनुसन्धान प्रमुख होमराज रेग्मी लगायतको उपस्थिति रहेको थियो ।