सायद नारी दिवस नमनाउने कमै नारी होलान । रुकुम पश्चिममा पनि बुधबार यस्तै दृश्य देखिएको छ । एकातिर नारी दिवसको धुमधाम कार्यक्रम त एकातिर काम प्यारो । धेरैलाई नारी दिवस लाग्यो । तर छाक टार्नको लागि काम गर्ने नारीलाई भने दिवसले छुन सकेन । यो त जिल्ला सदरमुकाममा  देखिएको घटना हो । गाउँ घरमा झन् सायद धेरै नारीहरुलाई दिवसले छुन सकेन होला । महिला दिदीबहिनी जम्मा भएर खलंगाको बालमन्दिर प्रांगणमा नारी दिवसको अवसरमा नाच गान र शुभकामना साटासाट गरिरहेका थिए । नजिकै रहेको कालिकास्थानमा भने केही महिलाहरु कामको चटारोमा थिए । केही पुरुष संगै २ महिला सडक निर्माणको काममा व्यस्त थिए । दुरिले हिडेर १ मिनेट समय पनि नलाग्ने बालमन्दिरमा भएको तामझामले उनीहरुलाई छुन सकेन । 

दिवसको अवसरमा आयोजना गरिएको कार्यक्रममा सहभागी महिलाहरु उठ जुटाैं नारी हो एक जुट हौं भनी रहेका थिए । यता सडक निर्माणमा जुट्नु भएकी मुसीकोट नगरपालिका १० चौखावाङकी टीका कँवरलाई भने नारी दिवस र दिवसमा लागेका नारा भन्दा पनि काम प्यारो थियो । ‘दिवसले के दिन्छ हुने खानेलाई पो नारी दिवस, हुँदा खाने काम गरेर छाक टार्ने हामीलाई त कामै प्यारो हो । काम नगरे त कहाँ खान मिल्छ र कँवर भन्नुभयो ।’ उहाँ संगै सडक निर्माणको काम गरिरहनुभएकी मुसीकोट १ की गीता सार्कीलाई पनि नारी दिवसले छुन सकेन । नजिकै नाच गान चलिरहेको थियो, उहाँको मन अडिएको छैन, नाच गान्न चलिरहेको ठाउँ तिर जान मन त छ, साथीले जाउ भन्दा पनि मन अमिलो बनाएर जान्न काम गरिरहेको छु, भन्नु पर्यो ।

 
‘नाच गान हेर्न जाने हो भने त साँझ के खानु ठेला गाडामा बेल्चाले वालुवा राख्दै उहाँले भन्नुभयो, यो त मेरो नियमित काम हो, बरु नियमित  काम नपाउदा चिन्ता हुन्छ ।’ रमाइलोले मात्रैले जीवन कहाँ चल्छ र काम नगरे त हामीलाई साझं बिहानको छाक टार्न देखि छोराछोरीलाई कसरी पढाउने भन्ने चिन्ता हुन्छ उहाँले अघि भन्नुभयो–यो त हाम्रो नियमित कर्म हो ।

टीका र गीता त प्रतिनिधि पात्र मात्र हुन । कयौं महिलाहरुलाई बुधबार मनाइएको अन्तराष्ट्रिय महिला दिवसले छुन सकेन् । ज्याला मजदुरी गरेर परिवारको छाक टाने देखि घरको भार थामिरहेका कयौं महिलाहरुले दिवस आए गएको पत्तै पाएनन् । यस्ता दिवस तथा अभियानहरु केही टाँठाबाठा महिलाहरुका लागि मात्र हो भन्ने जस्तो भइरहेको देखिन्छ । ग्रामिण भेगका महिला र श्रमिक महिलाहरुलाई यस्ता सामाजिक अभियानहरुले छुने गरेको देखिन्न ।