स्वतन्त्र विद्यार्थी यूनियन (स्ववियू) निर्वाचनका लागि रुकुम पश्चिमको मुसिकोट खलंगा बहुमुखी क्याम्पसमा उम्मेदवारी दिएका तीन संगठनका अधिकांश उम्मेदवारको उम्मेदवारी खारेज भएको छ । निर्वाचन कानून अनुसार नभएको भन्दै अध्यक्ष, सचिव र कोषाध्यक्षकै उम्मेदवारी खारेज भएको हो । 

क्याम्पसमा नेकपा माओवादी केन्द्र निकट अखिल क्रान्तिकारीले एकल रुपमा उम्मेदवारी दिएको थियो भने उसका विरुद्ध नेपाली कांग्रेस निकट विद्यार्थी संगठन नेविसंघ, नेकपा एमाले निकट अनेरास्ववियू र विप्लव नेतृत्वको नेकपा निकट अखिल क्रान्तिकारीले मिलेर उम्मेदवारी दिएका थिए । 

जसअनुसार अध्यक्ष सहित १ सदस्यमा नेविसंघ, सचिव सहित २ सदस्यमा अनेरास्ववियू र कोषाध्यक्ष सहित १ सदस्यमा अखिल क्रान्तिकारीको उम्मेदवारी परेको थियो । तर अध्यक्ष पदका उम्मेदवार करिष्मा केसी, सचिव पदका उम्मेदवार दिनेश ओली र कोषाध्यक्ष पदका उम्मेदवार रुपा वस्नेतको उम्मेदवारी खारेज भएको छ । 

मुसिकोट खलंगा बहुमुखी क्याम्पस स्ववियू निर्वाचन अधिकृत डम्बरबहादुर खड्काका अनुसार अध्यक्ष केसीका प्रस्तावक महेश ओलीको भर्ना खारेज भएको, सचिव ओलीको वारेस भनिएका व्यक्तिले आफु कसैको वारेस नभएको बताएको र कोषाध्यक्ष रुपा वस्नेतको नाम मतदाता नामावलीमा रुपकुमारी वस्नेत भेटिएकोले उम्मेदवारी खारेज भएको हो । 

त्यस्तै सदस्यका उम्मेदवार नवराज ओलीको समर्थक बसेका महेश ओलीको भर्ना खारेज भएको र सेतु ओलीले उम्मेदवारी फिर्ता लिएपछि २ जना सदस्यको पनि उम्मेदवारी खारेज भएको निर्वाचन अधिकृत खड्काले बताउनुभयो । अव यो प्यानलबाट उष्मानी पनुमगर र सरस्वती सापकोटाको मात्र उम्मेदवारी कायम भएको निर्वाचन समितिले जारी गरेको उम्मेदवारको अन्तिम नामावलीमा उल्लेख छ । 

उता अखिल क्रान्तिकारीका भने सबैको उम्मेदवारी कायम भएको छ । अखिल क्रान्तिकारीबाट अध्यक्षमा रमेश केसी, सचिवमा दुर्गाप्रसाद विश्वकर्मा, कोषाध्यक्षमा तुलसा खनाल र सदस्यहरुमा आशिष खत्री, यमराज डाँगी, बिष्णु ओली तथा लोकेन्द्र विकको उम्मेदवारी कायम भएको छ । निर्वाचन तालिका अनुसार मुसिकोट खलंगा बहुमुखी क्याम्पसमा चैत्र ३ गते स्ववियू निर्वाचन हुँदै छ ।

निर्वाचन समितिले प्रकाशन गरेकाे उम्मेदवारकाे अन्तिम नामावली: