रुकुम पश्चिमको मुसिकोट नगरपालिका वडा नम्बर १ खलंगामा आयोजित रुकुम कृषि, पर्यटन, व्यापार तथा साँस्कृतिक महोत्सव सम्पन्न भएको छ । खलंगाको बराहटाकुरामा संचालित महोत्सव १२ दिनमा आज सम्पन्न भएको हो । महोत्सवमा अन्तिम दिन आज गायक पुष्कल शर्माले प्रस्तुति राख्नुभयो । 

आज पनि झरीमै हजारौं दर्शक महोत्सव हेर्न पुगेका थिए । केही दिन देखि बदली भएको मौसम आज पनि उस्तै रह्यो । दिउँसो देखि लगातार पानी परिरहेको छ । तर महोत्सव स्थलमा छाता ओढेर खचाखच दर्शक भरिएका थिए । पानी पानीमा पनि पुष्कलको प्रस्तुतिमा दर्शकहरु झुमेका थिए । सोमबार पनि पानीकै विचमा दर्शकहरु रमाएका थिए । 

त्यसअघि पनि पानी परेको थियो । तर पानीले महोत्सवलाई कुनै प्रभाव नपारेको आयोजकले जनाएको छ । पानी परेर दर्शकहरुले सास्ती भोग्नु परेपनि दर्शकको उपस्थितिमा भने कुनै असर नपरेको महोत्सव संयोजक डिल्ली परियारले बताउनुभयो । दर्शकको मायाले थप हौसला मिलेको उहाँले बताउनुभयो । करिब १ लाख दर्शकले महाेत्सव अवलाेकन गरेकाे उहाँकाे भनाई छ । 

जिल्ला सदरमुकाममा २०७४ पछि पहिलो पटक महोत्सव आयोजना गरिएको हो । लामो समयपछि महोत्सव आयोजना भएकोले पनि दर्शकहरुको राम्रो साथ पाएको आयोजकको भनाई छ । त्यस्तै सही व्यवस्थापनका कारण महोत्सव भव्य भएको र हजारौं दर्शकको साथ पाएको आयोजक राष्ट्रिय लोक दोहोरी गित प्रतिष्ठान रुकुम पश्चिमका अध्यक्ष तुल देवकोटाले बताउनुभयो । 

कलाकार संयोजन, व्यवस्थापन, प्रचारप्रसार, जिल्लाका सरोकारवाला निकायको सहयोग लगायतबाट महोत्सव शान्तीपूर्ण वातावरणमा भव्य रुपमा सकिएको उहाँले बताउनुभयो । चर्चित अभिनेता तथा मोडल पल शाहलाई आयोजकले जेलमुक्त भएपछि पहिलो पटक रुकुम महोत्सव मार्फत सार्वजनिक कार्यक्रममा सहभागी बनाउन सफल भयो । 

जसका कारण पनि महोत्सव देश तथा विदेशमा चर्चामा आयो । त्यस्तै महोत्सवमा नायक आर्यन सिग्देल, गायक रामजी खाँड, गायिका तथा मोडल ज्योती मगर, गायक पुष्कल शर्मा, गायिका पूर्णकला बिसी, टीका सानु, एलिना चौहान, टंक तिमल्सिना, रोशन सिंह, तिलक परियार लगायतका राष्ट्रिय कलाकार तथा स्थानीय कलाकारहरुले पनि महोत्सवमा प्रस्तुति राखे । 

यस पटक महोत्सवमा थुप्रै स्थानीय कलाकारहरुको उपस्थिति देखियो । आयोजकले महोत्सव अवधिभर सहयोग गरेको भन्दै स्थानीय कलाकारहरुलाई प्रोत्साहन स्वरुप ४० हजार सहयोग गरेको राष्ट्रिय लोक दोहोरी गित प्रतिष्ठान रुकुम पश्चिमका निवर्तमान अध्यक्ष अमित परियारले बताउनुभयो । 

त्यस्तै महोत्सवबाट उठेको रकमबाट २ जना क्यान्सरका बिरामीलाई समेत १०/१० हजार सहयोग गरेको उहाँको भनाई छ । बराहटाकुरामा रहेको कबर्ड हलमा बत्ति व्यवस्थापनका लागि पनि १२ हजार सहयोग गरेको परियारले बताउनुभयो । रकम बच्यो भने कला संग्रालय स्थापनामा प्रयोग गर्ने आयोजकले जनाएको छ ।

आयोजकले महोत्सव सफल पार्न सहयोग गर्ने सबैलाई आभार सहित धन्यवाद समेत दिएको छ । राष्ट्रिय लोक तथा दोहोरी गित प्रतिष्ठान रुकुम पश्चिम र कला साँस्कृतिक पर्यटन प्रवद्र्धन मञ्च रुकुम पश्चिमले संयुक्त रुपमा महोत्सव आयोजना गरेका हुन् ।