रुकुम पूर्वको सिस्ने गाउँपालिका वडा नम्बर ५ र ६ का माथिल्लो भेगका बस्ति सडक सञ्जालमा जोडिएका छन् । रुकुमकोट द्धारे खोपिचार होर्दिङ कुचिबाङ दोमई सडक खण्ड अन्तर्गत दुधिल्लागैरा–भैंसीखाल झिंग्री र खोपिचार लगायतका वस्ती सडक सञ्जालमा जोडिएका हुन् । 

विगत देखि नै सडक सञ्जालको सुविधाबाट बञ्चित भएका स्थानीयवासीको आवश्यकलाई मध्यजनर गर्दै लुम्बिनी प्रदेशको प्रादेशिक सडक अन्तर्गत सडक पूर्वाधार विकास कार्यालय रुकुमकोटले वितेको आर्थिक वर्ष २०७७÷०७८ मा  सडकको ट्रयाक खोलेको थियो । 

उक्त सडक खण्डको ३ वर्षपछि आ.व. २०७९/०८० मा पातिहाल्नाबाट होर्दिङसम्म सडक पुगेको छ । दुधिल्लागैरा–पातिहाल्ना देखि होर्दिङसम्म करिव साढे ६ किलोमिटर सडक निर्माण भएको छ । अब लक्ष्य अनुसार साढे तीन किलोमिटर सडक निर्माण गर्न बाँकी  रहेको सडक पूर्वाधार विकास कार्यालयका सूचना अधिकारी विकास गौतमले जानकारी दिनुभयो । 

उहाँका अनुसार आर्थिक वर्ष २०७७/०७८ मा कुल ३५ लाख बजेटबाट कोपिला निर्माण सेवाले ३ किलोमिटर सडक निर्माण गरेको थियो । त्यसपछि २०७८/०७९ मा कुल २५ लाख रकमबाट एम.बि. ग्रुपले १ दशमलव ७ किलोमिटर, र आर्थिक वर्ष २०७९/०८० मा कुल २० लाख बजेटबाट पाण्डे निर्माण सेवाले सोही खण्डको १ दशमलव ६ किलोमिटर सडक निर्माण गरेको हो । 

३ आर्थिक वर्षमा कुल ८० लाख बजेटबाट साढे ६ किलोमिटर सडक निर्माण गरिएको सडक पूर्वाधार कार्यालयले जानकारी दिएको छ । कार्यालयका अनुसार यो सडक खण्ड क्रमागत योजना अन्तर्गत भएकाले बजेट फेरि थप भएमा आवश्यकता अनुसार चौडा,  मेसिनरीवाल लगायत स्तरोन्नतिका काम गरिने बताइएको छ ।  पर्याप्त बजेट आएमा चालु आर्थिक वर्षमै भूमे गाउँपालिका वडा नम्बर ८ को  कुचिवाङ देखि दोमइसम्म सडक पुर्याउने लक्ष्य लिइएको सडक पूर्वाधार कार्यालय रुकुमकोटले जानकारी दिएको छ ।