रुकुम पश्चिमको चौरजहारी नगरपालिकाका सबै विद्यालयलाई टिनको छानामुक्त बनाउन थालिएको छ । नगरभित्रका सबै सामुदायिक विद्यालय आगामी आर्थिक बर्षसम्म टिनको छानामुक्त हुदैछन् । नगरपालिकाको नीति तथा कार्यक्रम अनुसार आर्थिक बर्ष २०७८/०७९ सम्म सबै विद्यालय टिनको छानामुक्त हुनेछन् । शिक्षा क्षेत्रमा प्रभावकारी काम गरेको नगरपालिकाले टिनको छाना मुक्त विद्यालय बनाउने नीति तथा कार्यक्रम बनाएको थियो ।

सोही नीति अनुसार अहिले धमाधम विद्यालयका भवनहरु निर्माण भइरहेका छन् । नगरपालिकामा ४० वटा सामुदायिक विद्यालय छन् । त्यसमध्य अहिले १८ वटा विद्यालयमा पक्की भवन निर्माण भइरहेका छन् । केही विद्यालयमा भने यो भन्दा पहिले नै पक्की भवन निर्माण भइसकेका छन् । नगर प्रमुख विशाल शर्माका अनुसार जनकल्याण मावि जोगिनेटा, आधारभुत विद्यालय नाख्ला, माध्यमिक विद्यालय खागल, मावि खहरे, आधारभुत विद्यालय नाखिरा, आधारभुत विद्यालय कालापाथरमा पक्की भवन निर्माण भइरहेका छन् ।

यसैगरी आधारभुत विद्यालय स्यालखोला, हिमालय मावि खोलागाउँ, जनकल्याण मावि सानाखोला, आधारभुत विद्यालय घर्तिकाँडा, आधारभुत विद्यालय जुम्लीपोखरी, आधारभुत विद्यालय लामिछानेगाउँमा पनि पक्की भवन बनिरहेको नगरप्रमुख शर्माले जानकारी दिनुभयो । बाँकी विद्यालयमा आगामी आर्थिक बर्षसम्म पक्की भवन निर्माण बनाइसक्ने लक्ष नगरपालिकाले लिएको नगरप्रमुख शर्माले बताउनुभयो । ‘विद्यालयमा पक्की भवन निर्माण भएसँगै टिनको छाना भएको भवन पनि भत्काइदैछ,’ नगरप्रमुख शर्माले भन्नुभयो, ‘अर्कोे बर्षसम्म सबै विद्यालय टिनको छानामुक्त भइसक्नेछन् ।’

सामुदायिक विद्यालयलाई पक्की बनाउनका लागि स्थानीय, प्रदेश र संघीय सरकार सँगसँगै लागेको उहाँले बताउनुभयो । जनकल्याण माध्यामिक विद्यालय सानाखोलाका प्रधानाध्यापक झुपालाल शर्माका अनुसार टिनको छाना भएको विद्यालयमा सिकेभन्दा पक्की भवनमा सिक्नु धेरै प्रभावकारी हुन्छ । टिनको छाना भएको विद्यालयमा हावा लाग्दा पानी पर्दा पढाउन र पढ्न सक्ने वातावरण नहुने प्रअ शर्माले बताउनुभयो ।