नेकपा माओवादी केन्द्रको सहायक संगठन योङ्ग कम्युनिष्ट लिग नेपाल (वाइसीयल) जिल्ला समन्वय समिति रुकुुम पूर्वले बालिका हत्यारालाई तत्काल पक्राउ गरी कानून बमोजिम कारबाही गर्न माग गरेको छ । जिल्ला प्रशासन कार्यालयमा ज्ञापन–पत्र बुझाउँदै वाइसीयलले जिल्लाको पुथाउत्तरगंगा गाउँपालिका वडा नम्बर ३ रन्माका दुई दिदी बहिनीका हत्यारालाई तुरुन्त पत्ता लगाइ कानूनी कारबाही गर्न ध्यानाकर्षण गराएको हो । 

वाइसीयलका जिल्ला इन्चार्ज मनबहादुर बिसी (बिद्रोही)ले बुझाएको ज्ञापन पत्रमा चैत्र २२ गते ११ वर्षिया रीना बुढा मगर र उनकी बहिनी ९ वर्षिया कालीमाया बुढा मगरको अज्ञात व्यक्तिबाट विभत्स हत्या गरी भीरमा फालिएको र उनीहरुले लगाएका गरगहना लुटेर लगेको घटनाले संगठनको गम्भिर ध्यानाकर्षण भएको उल्लेख गरिएको छ ।  

शान्ति सुुरक्षा र अमनचयनको जिम्मा पाएको प्रहरी प्रशासनले यथाशिघ्र हत्याराको खोज तलास गरी तुरुन्तै कानूनी कारवाही गर्न वाइसीयल माग गर्दछ, पत्रमा भनिएको छ । साथै वाइसीयलले मृतक दिदी बहिनीप्रति श्रदाञ्जली अर्पण गर्दै शोकाकुल परिवारजनमा समवेदना प्रकट गरेको छ । 

वाइसीयलले निमित्त प्रमुुख जिल्ला अधिकारी हिरालाल आचार्यलाई ज्ञापन पत्र बुझाएको हो । चैत्र २२ गते दिउँसो घरबाट सिस्नो टिप्न भनि घर नजिकैको ठाउँमा गएका तारामान बुढाका ११ वर्षिया छोरी रीना बुढामगर र ९ वर्षिया छोरी कालिमाया बुढामगर नजिकैको भीरमा हत्या गरी फालिएको अवस्थामा फेला परेका थिए । उनिहरुले लगाएका गर गहना सबै लुटेर लगिएको थियो ।

प्रहरीले घटनाको अनुसन्धान भइरहेको जनाएको छ । घटनामा संलग्नको खोजी भइरहेको जिल्ला प्रहरी प्रमुख प्रहरी नायव उपरीक्षक अञ्जना श्रेष्ठले जानकारी दिनुभयो । तालिम प्राप्त कुकुर सहितको प्रहरी टोली गएर घटनास्थलको छाँन मारेको र घटनाको अनुसन्धान जारी नै रहेको उहाँको भनाई छ ।